• Eth Conselh Generau d’Aran a començat aué a examinar dera prumèra convocatòria, des nivèus A1 enquiath C1, en Vielha e en Barcelona (a compdar de deman).

Aué an començat es pròves oficiaus entara obtencion des certificats d’aranés/occitan deth Departament de Cultura e Lengua deth Conselh Generau d’Aran corresponentes ath cors 2025-2026. Era jornada inaugurau a començat damb es pròves oraus deth nivèu A2 ena sedença deth Govèrn d’Aran, en Vielha, e damb es pròves escrites, que s’an hèt ena Escòla Garona de Vielha.

Ath long d’aguesta prumèra convocatòria, que se hè entre eth 25 de mai e eth 4 de junh de 2026, se haràn es examens des nivèus A1, A2, B1, B2 e C1. Es pròves escrites se hèn de manèra presenciau, mentre es pròves oraus se hèn online damb oraris assignadi, individuaument o de dus en dus.

Eth calendari prevé entà deman, 26 de mai, es pròves escrites deth nivèu A2; eth 27 e 28 de mai serà eth torn tàs oraus deth A1 e tar escrit deth B1; e es dies 1 e 2 de junh se haràn es examens deth nivèu B2. Entà acabar, es pròves deth nivèu C1 se haràn es dies 3 e 4 de junh. Era dusau convocatòria se harà entre eth 1 e eth 4 de seteme de 2026.

Eth Conselh Generau d’Aran a metut en valor “er increment der interès pera formacion e certificacions en aranés, atau com era participacion d’estudiants, docents e professionaus dera administracion publica”.

Tota era informacion sus es certificats e convocatòries se pòt consultar ena web oficiau: aranes.conselharan.org

Vielha, 25 de mai de 2026