• Era secretària de Politiques Digitaus, Maria Galindo, a visitat Aran entà conéisher de prumèra man es darrèri projèctes impulsadi amassa damb eth govèrn aranés e er Institut entath Desvolopament e era Promocion deth Naut Pirenèu e Aran (IDAPA) en marc der Airau Digitau Aran

 

• S’an presentat e hèt es demostracions d’un pilòt de logistica de transpòrt de carga damb dròns en entorns d’accès dificil, a un aute de cultura immersiva damb realitat virtuau e aumentada, e d’un tresau entà melhorar, damb dròns, era seguretat enes corses de montanha

Es entorns d’Arres de Sus, an estat er scenari des demostracions e presentacions des tres darrèri projèctes que s’an impulsat des der der Airau Digitau Aran. Aguestes iniciatives cerquen dar responsa a rèptes reaus deth territòri damb solucions innovadores basades en tecnologies digitaus auançades e, ath madeish temps, promòir era diversificacion e aumentar era competitivitat deth teishut empresariau aranés.

Era presentacion, organizada per HèPic, eth centre d’innovación damb eth Conselh Generau d’Aran, s’a enfocat enes tres solucions tecnologiques desvolopades per enterpreses araneses en tres projèctes pilòt restacadi ara logistica, era promocion culturau e era seguretat en activitats en montanha.

L’an presidida era secretària de Politiques Digitaus dera Generalitat de Catalunya, Maria Galindo; e eth conselhèr d’Innovacion deth Conselh Generau d’Aran, Oriol Sala, e an compdat tanben damb era participacion dera presidenta der IDAPA, Amalia Sanz; e des CEOs des enterpreses araneses implicades en desvolopament des  projèctes presentadi: Cargo Drone Solutions, Arantec e UTMB Iberia.

Tanben i an assistit representants dera Diputació de Lleida e dera Cambra de Comerç de Lleida, coma membres der Airau Digitau Aran, e dera Secretaria de Politiques Digitaus, eth centre de recèrca i2CAT e era Mobile World Capital, coma entitats promotores dera iniciativa Airaus Digitaus.

 

 

Resultats deth pilòt de logistica de transpòrt de carga damb dròns

Ena tardor d’enguan comencèc eth projècte ‘ARCHYTAS II’, damb eth qu’era enterpresa aranesa Cargo Drone Solutions amièc a tèrme 101 vòls damb dròns de carga en qué transportèc 1.539 kg de materiau, en tot recórrer un totau de 202 km (182 km orizontaus e 66 km verticaus) en zònes de dificil accès.

Aguesta pròva pilòt a auut coma objectiu era validacion de solucions logistiques de transpòrt de cargues pesantes (d’entre 15 e 30 kg) damb sistèmes d’aeronaus non tripulades (UAS), damb era fin de redusir eth temps de liurament, es còsti operatius e er impacte ambientau.

Es casi d’usatge seleccionadi includissen rotes entà melhorar era rapidesa deth transpòrt de subministraments en entorns isoladi, supòrt logistic en zònes de nauta afluéncia e orografia complèxa, facilitar era mantenença d’infrastructures de comunicacion, eth transpòrt de materiaus de supòrt pagés e provisionament e gestion de residus en refugis de montanha.

Dusau fasa deth GUARDA+: experiéncia immersiva ena Glèisa de Santa Maria d’Arties

Mejançant lunetes de realitat aumentada e realitat virtuau, eth projècte ‘GUARDA+ 2.0’, desvolopat pera enterpresa Arantec, permet descorbir es contenguts en nauta definicion dera Glèisa romanica de Santa Maria d’Arties.

Aguesta dusau fasa deth projècte s’a centrat en combinar era tecnologia de modèls tridimensionaus detalhadi damb filmacions estereoscopiques de 360º entà aufrir ua experiéncia damb ua major sensacion de prigondor des impressionantes pintures muraus reneishentistes (prumèra meitat deth sègle XVI) e deth retaule gotic deth sègle XV.

Arantec tanben trabalhe ena reconstruccion 3DGS (3D Gaussian Splatting) dera majestuosa estructura arquitectonica d’aguesta jòia deth romanic, damb ua vista d’audèth que permet apreciar toti es elements decoratius damb ua naua resolucion.

Ath delà, es imatges s’acompanharàn d’explicacions locutades que relataràn era istòria qu’amaguen es fresqui entà hèr qu’era experiéncia des persones usatgères sigue era mès immersiva possibla.

 

Inici der Aran by UTMB Dròn

Era darrèra demostracion, a consistit ena projeccion d’un video de supòrt damb dròn que Cargo Drone Solutions realizèc pendent un simulacre amiat a tèrme en Tuc dera Salana era maitiada deth deluns 22 de junh, en quau se meteren a pròva es sistèmes auançadi de gestion de seguretat damb dròns dera Val d’Aran by UTMB 2026, un des eveniments de trail running (corses de montanha) mès importanti e exigenti deth mon, que comence aué e enquiath 5 de junhsèga en Aran.

Damb aguest acte s’a inaugurat eth projècte pilòt pionèr ‘Aran by UTMB Drone’, que  deman iniciarà es operacions de seguiment, susvelhança e supòrt aerian damb dròns pendent es corses de 55 km, 100 km e 163 km de la Val d’Aran by UTMB.

Era iniciativa a coma objectiu refortilhar era seguretat enes corses de montanha de nauta complexitat e grana participacion a trauès der usatge de dròns equipadi damb camères termiques, vision nocturna e intelligéncia artificiau (IA).

Sus er Airau Digitau Aran

En acabar es demostracions de camp d’aguesti projèctes, toti es membres der Airau Digitau Aran an celebrat eth Comitat Estrategic ara sedença deth govèrn aranés, en Vielha, a on s’an exposat es resultats des pilòts ja finalizadi e es objectius deth nau projècte presentat aué.

Eth Conselh Generau d’Aran, a trauès de l’HèPic, ei eth lidèr der Airau Digitau Aran, que compde damb eth supòrt der Institut per al Desenvolupament i la Promoció de l’Alt Pirineu i Aran (IDAPA), era Diputació de Lleida e era Cambra de Comerç de Lleida.

Er Airau Digitau Aran s’inscriu ena iniciativa Airaus Digitaus, impulsada peth Govèrn -a trauès dera Secretaria de Politiques Digitaus deth Departament d’Empresa e Trabalh- damb eth supòrt deth centre de recèrca i2CAT e era Mobile World Capital Barcelona, entà fomentar er ecosistèma e es estratègies d’aplicacion de tecnologies digitaus auançades en tot Catalunya e generar atau naui projèctes e inversions en innovacion e desvolopament en territòri.

En paraules deth conselhèr d’Innovacion deth Conselh Generau d’Aran, Oriol Sala: «Damb aguesti pilòts, demostram eth succès de balhar supòrt as empreses araneses entà innovar e desvolopar naues tecnologies, pr’amor que les permet adquirir coneishements tà ampliar es sòns servicis e èster mès competitives».

Entara secretària de Politiques Digitaus dera Generalitat de Catalunya, Maria Galindo: «Damb es Airaus Digitaus non desplegam tecnologia sonque entà digitalizar eth territòri, mès lèu entà generar activitat economica, crear naues linhes de negòci, arraïtzar talent, diversificar era economia locau, aumentar era competitivitat deth teishut empresariau catalan e crear aucupacion qualificada en tot eth país.

Damb projèctes coma aguesti, escalables e exportables, dam responsa a rèptes reaus dera Val d’Aran, identificadi pes sòns principaus agents, damb solucions desvolopades per empreses araneses qu’impacte en aguest territòri».

 

Vielha, 1 de junhsèga de 2026