- Ara, damb naui rèptes, volem conéisher es prioritats des aranesi e araneses e decidir que hèm prumèr damb un senzilh formulari
En 2020, mès de 200 persones participèren en debat dubèrt Aran Accion 2020-30 e s’amassèren periodicament en 7 grops de trabalh. Alavetz, s’auec de hèr telematicament pr’amor dera pandèmia dera COVID-19, que tanben suposèc disposar de mès temps entà méter en comun es diuèrses prepauses.
Pendent aguesti darrèri 6 ans, eth govèrn aranés a hèt realitat eth 88% de totes es aportacions compartides pera gent d’Aran que formèc part d’aqueth procès participatiu. Les podetz consultar en ligam ara seguida: Aran Accion 2020-2030 | Conselh Generau d’Aran
Dempús d’aguest succès, volem tornar a decidir en conjunt eth futur d’Aran en aguesta dusau fasa en tot demanar quines son ara es prioritats deth nòste territòri pr’amor qu’actuaument es oportunitats e rèptes an cambiat.
Ei per aquerò que volem saber de prumèra man coma a d’èster er Aran deth 2030 entà qu’era ciutadania aranesa víuegue milhor en tot prepausar un format simple de participacion a trauès d’un QR damb un formulari sense registre e anonim: ARAN ACCION 2020/2030 Coma voleries que siguesse era Val d’Aran en 2030?: Rellenar formulario
Es responses son dubèrtes e se i pòden híger es tematiques que considères que calerie includir. En sonque 5 minutes poiràs respóner aportant qué penses que s’aurie de hèr prumèr e qué cambiaries. Aguest formulari serà dubèrt enquiath 15 d’agost e dempús s’avaloraràn totes es aportacions en tot hèr un retorn des resultats.
Eth Govèrn d’Aran ençà, a trauès des Servicis Assistenciaus Integrats d’Aran, a iniciat es diferenti diagnòsis ara seguida: Plan de discapacitat, Planificacion de migracions e antiracisme, soledat non volguda, eth Fòrum de Joenessa e eth Plan d’Accion Comunitària. Es conclusions de toti aguesti procèssi se higeràn a tota era informacion remassada enes formularis d’Aran Accion 2020-30 ena tematica de Atencion as persones entà non doblar procèssi participatius.
En aguesta dusau fasa, de nau volem escotar-te entà dar prioritat as besonhs reaus dera gent d’Aran a trauès d’ua participacion activa e senzilha.
Vielha, 3 de junh de 2026