• Es accions includissen era milhora deth paviment, era conservacion periodica des cantères e naues mesures entà refortir era seguretat viària e des ciclistes en hilat de carretères araneses.

En responsa ar escrit presentat peth Govèrn d’Aran eth passat 7 de mai de 2026, a on se sollicitaue impulsar accions de manteniment, conservacion e milhora des carretères dera Val d’Aran, era Generalitat de Catalunya a comunicat ath Conselh Generau d’Aran es accions que meterà en marcha en hilat viari aranés.

En çò que hè ara conservacion deth paviment, ath long deth mes de junh s’a executat ua campanha de reparacion des horats ena carretèra C-28. Ath delà, entath semèstre que ven ei prevista ua intervencion tà milhorar eth paviment ena C-142B, entre eth punt quilometric 0 e eth 3+256. Tanben se haràn trabalhs de milhora ena C-28, especiaument en tèrme d’Arties, atau coma diuèrsi apariaments puntuaus ath long deth sòn recorrut.

En matèria de conservacion, eth Departament de Territòri, Abitatge e Transicion Ecologica a confirmat que se harà ua neteja periodica des cantères damb ua freqüéncia aproximada de cada dus o tres mesi, entà garantir ues condicions optimes de seguretat e circulacion. Era prumèra neteja s’a hèt aguesta setmana, e non se descarten intervencions extraordinàries quan sigue de besonh.

En çò que tanh ara seguretat des ciclistes, a prepausa deth govèrn d’Aran, era Generalitat installarà senhaus verticaus P-22 d’avís de preséncia de ciclistes ena carretèra C-28, en tram comprés entre Vielha e Baquèira. Parallèlament, se trabalhe en informe viable d’acòrd damb era normativa en vigor tara implantacion dera senhalizacion tà rebrembar era distància minimau d’1,5 mètres enes auançaments.

E en çò que hè ara possibla installacion de senhalizacion especifica de ciclotorisme enes pòrts de montanha, eth Departament rebrembe que quinsevolh intervencion s’aurà d’ajustar as condicions tecniques e as critèris establidi entath hilat de carretères de Catalonha. En cas qu’aguesta senhalizacion sigue viabla, calerà formalizar era sollicitud d’autorizacion corresponenta deuant deth Servici Territoriau.

Eth Conselh Generau d’Aran avalore fòrça positivament qu’aguest compromís servisque entà dar continuitat as gestions hètes enquiath moment entà milhorar era seguretat, eth manteniment e era qualitat des infrastructures viàries deth país, e trabalharà entà que totes es accions s’executen laguens des tèrmes previsti.

Vielha, 9 de junhsèga de 2026