• Es regulacions s’aplicaràn entre eth 10 de junhsèga, e eth 30 de seteme enes principaus zònes naturaus dera Val d’Aran, damb informacion en temps reau sus era disponibilitat des parcatges e un dispositiu d’atencion as visitaires.

Eth Conselh Generau d’Aran, a trauès de Torisme Val d’Aran, a metut en foncionament aué eth dispositiu de regulacion der accès e era mobilitat enes principaus espacis naturaus deth territòri entath periòde d’ostiu de 2025. Aguesta accion a coma objectiu preservar eth mèdi naturau, melhorar era seguretat, ordenar era mobilitat e evitar era saturacion des espacis mès sensibles.

Eth calendari de regulacion previst ei eth següent:

• Ribèra de Varradòs: deth 10 de junhsèga ath 2 de seteme.
• Artiga de Lin: deth 10 de junhsèga ath 2 de seteme.
• Ribèra d’Aiguamòg e Valarties: deth 10 de junhsèga ath 6 de seteme.
• Bassa d’Oles: deth 24 de junhsèga ath 2 de seteme.
• Bassa d’Arres: deth 24 de junhsèga ath 2 de seteme.

Entà garantir eth bon foncionament deth dispositiu, eth Conselh Generau a contractat a 21 persones, 5 entàs punts informatius e parcatge dera Artiga de Lin, 5 de refòrç entàs oficines de torisme d’Arties, Salardú e Vielha, 9 persones tàs 6 punts de regulacion d’accès tath mèdi naturau, e 2 coordinadors en punts de regulacion accès tath mèdi naturau que prestaràn servici enes diferenti punts d’informacion installadi enes zònes regulades, entà informar e assistir as visitaires.

Tanben s’an abilitat es sies pantalhes informatives enes principaus accèssi tath mèdi naturau e sensors de pas entath contròl e compdatge de veïculs. Aguestes pantalhes mòstren en temps reau era disponibilitat des parcatges reguladi, ua informacion que tanben se poderà consultar a trauès dera aplicacion Guidaran e deth portau aparcaran.conselharan.org.

Josep Canut, conselhèr de Torisme, explique que “damb era regulacion des accèssi se vò consolidar un modèl de gestion toristica que compatibilize era arribada de visitaires damb era proteccion der entorn naturau”. Segontes Canut, “era riquesa paisatgistica e patrimoniau dera Val d’Aran requerís mesures que n’asseguren era conservacion a long tèrme e, ath madeish temps, contribuïsquen a melhorar era mobilitat, era seguretat e era experiéncia des persones que mos visiten, entà facilitar ua gestion mès ordenada des fluxes toristics”.

Eth conselhèr de Territòri, Paisatge e Cambi Climatic, Francisco Bruna, soslinhe que “era regulacion des accèssi s’includís laguens dera politica de gestion sostenibla deth territòri impulsada peth Conselh Generau d’Aran”. Segontes Bruna, “aguesta mesura permeterà organizar damb mès eficàcia era circulacion enes pistes que condusissen tàs espacis naturaus, afavorir era preservacion der entorn e ua melhor convivéncia entre era activitat toristica e es valors naturaus dera Val d’Aran2.

Eth Conselh Generau d’Aran rebrembe era importància de respectar era senhalizacion, es indicacions deth personau informador e es normes d’accès entà compatibilizar era visita tath mèdi naturau damb era sua conservacion, e contribuïr a un modèl de mobilitat mès ordenat e sostenible.

Vielha, 11 de junhsèga 2026