• Eth dissabte 1 d’agost, eth Conselh Generau d’Aran organize era dusau edicion dera Jornada OVIHUEC en collaboracion damb er Ajuntament de Vilamòs e er IRTA.

• En programa i aurà charrades, activitats culturaus, un dinar popular e talhèrs, tot pensat entara participacion de toti es publics.

Vilamòs se convertirà eth dissabte 1 d’agost en scenari d’aguest eveniment entà hèr a conéisher er auanç d’OVIHUEC. Un projècte innovador que refortís era capacitat des ramats extensius de protegir er entorn entà redusir eth risc d’incendis e milhorar era biodiversitat.

Aguesta jornada arrincarà damb charrades divulgatives sus ramaderia sostenibla qu’aproparàn ara ciutadania era importància de suenhar eth paisatge. Ara seguida, i aurà balhs aranesi, un tast de hormatges de diuèrses varietats produsides en Pirenèu e un amàs de scènes de microteatre entà reflexionar sus era transformacion dera vida rurau en Aran. Dempús, es anhèths deth ramat d’OVIHUEC seràn eth plat principau deth dinar popular qu’aurà lòc ena carpa de Vilamòs.

Tant entath tast de hormatges coma entath dinar, ei de besonh auer un tiquet que se pòt arténher en Ajuntament de Vilamòs e ena Oficina de Torisme de Vielha deth 23 ath 31 de junhsèga. Era totalitat der impòrt recaptat se darà ara Associacion contra eth Càncer ena Val d’Aran.

Ena tarde, se realizaràn dues activitats en familha damb punt de trobada en 1èr pis dera sala sociau de Vilamòs, organizades pera Associacion Aran pera Natura. Membres deth projècte OVIHUEC que desvolòpen er estudi e seguiment dera flòra e era fauna des entorn de Vilamòs. Tanben i aurà talhèrs restacadi damb es productes derivats, un de hilar damb lan e, un aute entà apréner a elaborar brossat e hormatge fresc.

Era assisténcia serà per orde d’arribada enquia completar era capacitat de 25 participants en cada ua des activitats e talhèrs.Tanben, pendent tota era jornada, en carrèr Campasèra i aurà un mercat damb diuèrsi productors de proximitat.

Dempús de dus ans d’investigacion damb eth ramat de oelhes e crabes publiques de Vilamòs, aguesta iniciativa, promoiguda per Ajuntament de Vilamòs, eth Conselh Generau e er IRTA, en collaboracion damb era Associacion Aran pera Natura e gràcies ath  finançament dera Fundación Biodiversidad a trauès deth Ministèri de Transicion Ecologica e Rèpte Demografic, ara er objectiu ei  generar activitat economica a trauès dera elaboracion de productes derivats de proximitat e de qualitat, entà arténher era autosuficiéncia deth ramat e milhorar es condicions laboraus des pastors e pastores.

Vielha, 22 de junhsèga 2026