• Er exercici a simulat er accident e posterior incendi d’un veïcul a on viatjauen dues persones.

• Eth simulacre a permetut verificar era coordinacion des còssi d’emergéncia e eth foncionament des installacions de seguretat deth tunèl.

Proteccion Civiu dera Generalitat, Pompièrs Emergéncies e eth Ministèri de Transpòrts e Mobilitat Sostenibla organizauen era net de  dimars a dimèrcles un simulacre d’accident en interior deth tunèl de Vielha Joan Carles I (N-230). Er exercici a metut a pròva eth Plan d’Autoproteccion (PAU) dera infrastructura, omologat pera Comission de Proteccion Civiu de Catalonha eth 4 de seteme de 2025, entà verificar era aplicacion des procediments d’intervencion deuant d’un accident damb er incendi d’un veïcul e damb persones afectades.

Eth simulacre a permetut avalorar era gestion dera emergéncia, qu’a compdar de 2023 ei responsabilitat deth Còs de Pompièrs d’Aran en tot eth territòri d’Aran, a trauès deth centre de contròtle deth tunèl, e era responsa des equipes d’explotacion e de prumèra intervencion. Tanben s’a verificat eth foncionament des elements de prevencion e seguretat pròpris dera infrastructura. Er objectiu principau a estat verificar eth desplegament des diferentes agéncies qu’an d’intervier en un sinistre d’aguestes caracteristiques, segontes er organigrama de desplegament deth Plan PROCICAT. En aguest sens, era gestion dera emergéncia s’a amiat a tèrme damb eth comandament de Pompièrs d’Aran, que i a intervengut activant eth nivèu 4 de responsabilitat.

Er scenari a simulat er accident d’un veïcul en interior deth tunèl, damb un incendi posterior e ua situacion de visibilitat redusida a causa deth hum. Es dues persones que viatjauen en veïcul resultauen afectades e er exercici a previst que podessen desplaçar-se pes sòns pròpris mejans enquia un refugi o ua galeria d’evacuacion. En moment der accident simulat, eth veïcul sinistrat ère er unic que i auie laguens deth tunèl. Un còp recebut er avís, se procedet ath barrament des accèssi nòrd e sud entà facilitar era intervencion des servicis d’emergéncia.

Eth Còs de Pompièrs d’Aran, coma responsable dera gestion dera emergéncia,  mobilizaue es diferenti grops includidi en esquèma deth Plan PROCICAT. Eth grop d’intervencion participaue en simulacre damb 6 dotacions de Pompièrs d’Aran, 14 pompièrs e 15 observadors, e compdaue damb eth supòrt des efectius de Bombers de la Generalitat sollicitadi pera Sala de Contròtle d’Aran (SCAran).

Pera sua part, es Bombers de la Generalitat i participauen damb ua dotacion deth parc de Pont de Suert, en responsa ara peticion d’ajuda hèta des dera Sala de Pompièrs. Tanben se i a desplaçat un comandament en qualitat d’observador.

Eth SABS, a trauès d’Aran Salut, coordinaue era gestion deth grop sanitari damb es recorsi dera equipa assistenciau dera USVA (Unitat de Supòrt Vitau Avançat) e eth responsable deth grop sanitari. Atau madeish, des dera SCAran se demanaue ajuda ath SEM, damb era participacion deth responsable sanitari.

Eth còs de Mossos d’Esquadra participauen en simulacre damb tres patrolhes, qu’an desvolopat es foncions deth grop d’orde. Ua d’eres s’integraue en Centre de Coordinacion entà facilitar era coordinacion damb era rèsta de servicis d’emergéncia, mentre qu’es autes dues se plaçauen enes boques nòrd e sud deth tunèl de Vielha, respectivament, entà controlar es accèssi e garantir era seguretat pendent eth desvolopament der exercici.

Eth Còs d’Agents de Miei Ambient deth Conselh Generau d’Aran e eth Còs d’Agents Ruraus i participauen aufrint supòrt as Mossos d’Esquadra laguens deth Grop d’Orde. Eth dispositiu compdaue damb era participacion de dus agents de basa e un comandament dera comarca dera Nauta Ribagòrça, mentre qu’eth Centre de Comandament Centrau tanben formaue part der exercici. Entre es objectius deth Còs i é eth de méter a pròva es protocòls d’avís e mobilizacion, era coordinacion operativa damb es diferenti còssi d’intervencion, er escambi d’informacion pendent era gestion dera emergéncia e era avaloracion dera afectacion qu’es trabalhs d’extincion poguen auer sus er entorn naturau immediat ath tunèl.

Eth Sistèma d’Emergéncies Medicaus (SEM) collaboraue ena assisténcia sanitària des persones afectades. Un còp eth SEM recebie era activacion per part deth telefòn d’emergéncies 112, es diferentes unitats, coordinades pera Centrau de Coordinacion Sanitària deth SEM, se desplaçaue tath lòc der incident, a on se metie a disposicion deth servici d’emergéncies dera Val d’Aran, gestionat per Pompièrs.

Entara realizacion der operatiu, eth SEM mobilizaue ua equipa umana formada per 7 professionaus e desplegaue tres unitats: 1 unitat de Supòrt Vitau Avançat (SVA), 1 unitat de comandament e 1 unitat de Supòrt Logistic Sanitari (SLS).

Vielha, 29 d’octobre de 2026