Era Val d’Aran acuelh era conferéncia internacionau sus era conservacion des estanhs e torbères de nauta montanha, en marc de LIFE RESQUE ALPYR

Deth 28 ath 30 d’octobre, era trobada a amassat especialistes internacionaus entà compartir coneishements e experiéncies sus era restauracion des ecosistèmes aquatics e era conservacion dera biodiversitat.

Era trobada a amassat especialistes, principaument des airaus scientific e tecnic, dedicadi ara conservacion e ara restauracion ecologica d’estanhs, barrancs, torrents, torbères, prats umits e d’auti ecosistèmes aquatics de nauta montanha. Aguesti espacis patissen ua pression creishenta derivada deth cambiament climatic, es alteracions idrologiques, es cambis enes usatges deth sòu e era introduccion d’espècies invasores.

Er objectiu dera trobada a estat compartir es auanci assolidi en aguest camp. Entre eri, es resultats vinculadi ath projècte LIFE RESQUE ALPYR (2022-2026), en marc deth quau s’an amiat a tèrme diuèrses actuacions de restauracion ecologica en quate espacis dera hilat Natura 2000 des Pirenèus e es Alps.

Entre aguestes actuacions subergessen era actuacion peonèra, realizada en Colomèrs per prumèr còp en sud d’Europa, d’eliminacion de peishi introdusidi en estanhs, era restauracion deth foncionament ecologic de torbères e prats umits, era melhora dera gestion ramadèra en aguesti ecosistèmes e era recuperacion d’espècies especiaument sensibles, coma amfibis, mamifèrs e invertebrats aquatics.

Ath delà de presentar es resultats obtengudi, entre es quaus i é era recuperacion dera biodiversitat, s’an compartit protocòls e metodologies que se poderien aplicar en d’auti endrets deth mon.

Un programa damb referents internacionaus

Entre es ponentes e es ponents convidadi an destacat Roland Knapp (Universitat de Califòrnia), referent internacionau ena restauracion d’estanhs de nauta montanha e ena conservacion des amfibis; Helge Bardal (Institut Veterinari Norvegian), especialista ena eliminacion d’espècies invasores en ecosistèmes d’aigua doça; Borja Jiménez-Alfaro (Universitat d’Oviedo), referent en biodiversitat vegetau e ecologia des torbères de montanha; e es investigadors Lucia Bello e Rocco Tiberti (Universitat de Calàbria), especialistes ena conservacion d’estanhs de nauta montanha e vinculadi dirèctament ath projècte LIFE RESQUE ALPYR.

Eth programa a includit tanben aportacions de representants des entitats sòcies deth projècte e des espacis protegidi a on s’an desvolopat es actuacions de restauracion.

Eth comitat scientific deth congrès a estat format per Teresa Buchaca e Marc Ventura (CEAB-CSIC), Rocco Tiberti (Universitat de Calàbria), Aaron Pérez-Haase (Universitat de Barcelona) e Quim Pou-Rovira (Sorelló), encargadi de velhar pera qualitat scientifica d’un programa qu’a amassat bèri uns des principaus especialistes internacionaus d’aguest encastre.

Era tresau e darrèra jornada dera trobada s’a dedicat a ua gessuda de camp tar estanh deth Montanheu d’Àrreu e tàs torbères des Clòts de Rialba, dus des espacis a on eth projècte LIFE RESQUE ALPYR a impulsat accions de restauracion ecologica.

Era gessuda a permetut as participants conéisher sus eth terren es resultats des intervencions amiades a tèrme e escambiar experiéncies sus es rèptes de gestion e conservacion d’uns des ecosistèmes mès singulars e vulnerables des montanhes europèes.

Restaurar ecosistèmes unics des Pirenèus e es Alps

Es ecosistèmes aquatics e semiaquatics de nauta montanha, coma estanhs, basses, arriuets, torbères e prats umits, acuelhen ua biodiversitat fòrça especializada e adaptada a condicions ambientaus extrèmes. Maugrat era sua grana valor ecologica, se tròben entre es abitats mès vulnerables as efèctes deth cambiament climatic e d’autes pressions d’origina umana.

Aguesti espacis aufrissen servicis ecosistemics essenciaus, coma er emmagazinatge d’aigua e de carbòni, era regulacion idrologica e era conservacion de nombroses espècies rares o menaçades. Per açò, era sua proteccion ei considerada ua prioritat a escala europèa.

En aguest contèxte, eth projècte LIFE RESQUE ALPYR a contribuït a generar coneishement scientific e airines de gestion que pòden facilitar era restauracion e era conservacion d’aguesti ecosistèmes en d’autes zònes de montanha des Pirenèus, es Alps e d’auti territòris europèus.