• Aguesta naua edicion se celebrarà es dies 6 e 7 de hereuèr de 2027 en Plan de Beret enes distàncies de 42, 21, 10 e 5 quilomètres, ena modalitat d’estil classic, entà facilitar era participacion d’esquiaires de diferenti nivèus e edats.

Era Val d’Aran se premanís entà acuélher ua naua edicion dera Marxa Beret, ua des pròves d’esquí de hons mès emblematiques deth Pirenèu e ua des trobades esportives mès consolidades deth calendari d’esquí nordic. Era 47au edicion, que se harà es dies 6 e 7 de hereuèr de 2027 en Plan de Beret, tornarà a amassar a esportistes e aficionadi d’aguesta disciplina en un entorn naturau privilegiat.

Era Marxa Beret, organizada tradicionaument peth Conselh Generau d’Aran e Baqueira Beret, s’a consolidat ath long des ans com ua trobada esportiva de referéncia, que combine era competicion damb eth caractèr popular e participatiu. Aguesta pròva represente tanben ua oportunitat entà promocionar era Val d’Aran coma destinacion esportiva e toristica d’iuèrn, e tà méter en valor eth sòn patrimòni naturau e era sua vinculacion damb es espòrts de nhèu.

Era edicion de 2027 compdarà damb quate recorruts de 42, 21, 10 e 5 quilomètres, toti eri ena modalitat d’estil classic. Aguesta varietat de distàncies permet adaptar era participacion as diferenti nivèus de preparacion fisica e experiéncia, des esquiaires mès experimentadi enquias persones que se vòlen iniciar ena practica der esquí de hons o gaudir d’ua jornada esportiva en familha.

Era Marxa Beret manten atau era sua esséncia com ua grana hèsta der esquí de hons, en tot fomentar era practica esportiva, era convivéncia entre participants e era promocion d’uns valors estretament restacadi damb er espòrt e eth respècte der entorn naturau.

Ath delà dera sua dimension esportiva, aguest eveniment constituís un important element de dinamizacion deth territòri, e contribuís ara projeccion dera Val d’Aran e ara promocion des activitats restacades damb era nhèu.

Vielha, 06 de noveme 2026