• Era trobada, celebrada eth passat 9 de noveme en Les e en Refugi dera Honeria en Sant Joan de Toran, a servit coma espaci de participacion e dialòg sus era importància des camins coma patrimòni naturau, culturau e identitari deth territòri.

Era Val d’Aran acuelhec eth passat 9 de noveme en Les ua naua amassada dera session plenària dera Taula de Camins deth Naut Pirenèu e Aran, er organ consultiu e participatiu der Institut entath Desvolopament e era Promocion deth Naut Pirenèu e Aran (IDAPA), qu’amasse representants d’administracions publiques, entitats, professionaus e agents vinculadi ara gestion, conservacion e promocion des camins pirenencs.

Ena jornada comencèc en Musèu des Hèstes deth Huec, en Les, damb era benvenguda deth sòn alcalde Andreu Cortés, Sr Josep Canut, conselhèr de Torisme deth Conselh Generau d’Aran e David Vallvé, director der IDAPA. Ara seguida es 38 participants se desplacèren tath refugi dera Honeria a on se hec ua rota guidada e ara seguida ua taula redona sus era evolucion deth senderisme es darrèri 40 ans.

Aguesta trobada s’inscriu en trabalh qu’impulse era Taula entà reconéisher es camins coma ua infraestructura fondamentau deth Pirenèu, tant pera sua valor patrimoniau e identitària coma pera sua utilitat entara mobilitat, er accès ath miei naturau e eth desvolopament d’activitats respectuoses damb er entorn.

Era Taula de Camins, integrada per ua quarantia d’agents publics e privats deth Naut Pirenèu e Aran, trabalhe entà promòir era conservacion e eth manteniment deth hilat de camins, fomentar era bona convivéncia entre es diferenti usatgèrs e impulsar iniciatives que contribuïsquen ara sua valorizacion.

Era Estratègia 2030, aprovada en noveme de 2025, establís era huelha de rota dera Taula e der IDAPA enquiara fin de 2030. Aguest document definís cinc encastres prioritaris: era proteccion e eth manteniment deth patrimòni de camins; er usatge respectuós e era convivéncia entre usatgèrs; era mobilitat activa, era salut e era accessibilitat; era cultura, era educacion e era identitat locau; e eth torisme, es servicis de guidatge e era senhalizacion.

En aguest marc, eth plan de trabalh de 2026 contemple iniciatives vinculades ara elaboracion d’inventaris municipaus de camins, era recuperacion de tecniques tradicionaus coma era pèira seca, era promocion d’itineraris saludables, eth desvolopament de projèctes educatius e culturaus e eth supòrt as activitats de senderisme.

Era celebracion d’aguesta trobada ena Val d’Aran met en valor era importància des camins tradicionaus coma part deth patrimòni collectiu deth territòri, e era necessitat de preservar-les e mantier-les coma espacis de connexion entre pòbles, paisatges e persones, en tot afavorir un modèl de mobilitat e de desvolopament territoriau respectuós damb eth miei naturau.

Vielha, 12  de noveme de 2026