• Eth Conselh Generau d’Aran trè a licitacion er arrendament e gestion d’aguest refugi entara sua explotacion tàs mesi de junhsèga, agost e seteme de 2025.

• A compdar de seteme de 2025 eth Conselh Generau d’Aran licitarà aguest servici entà ueit ans ath temps qu’amiarà a tèrme tota ua sòrta d’òbres de besonh entà actualizar aguest equipament.

Eth Conselh Generau d’Aran a trèt a concors era gestion deth refugi de Restanca qu’a de  servir entà garantir era sua explotacion enes mesi d’ostiu, en tot demorar poder amiar a tèrme es melhores de besonh tà actualizar-lo pendent era tardor.

Aguesta licitacion s’a demorat en temps pr’amor dera complexitat tecnica, autant a nivèu des intervencions a realizar en pròpri refugi, coma es trabalhs administracions, tostemp damb  era volontat de garantir eth servici pendent es mesi de maxima afloéncia atau coma seguretat juridica e administrativa des arrendataris.

Atau donc, eth refugi sauvat demorarà dubèrt pendent es mesi d’ostiu en tot limitar-ne era capacitat a 50 persones, entà garantizar era seguretat e eth compliment dera normativa vigenta. Aguesta qüestion serà subsanada ena licitacion definitiva pr’amor des actuacions de melhora que se realizaran a compdar deth mes d’octobre.

Javier Cavero, vicesindic tresau e conselhèr d’espòrts deth Conselh Generau d’Aran a manifestat que  “eth govèrn d’Aran tostemp a estat conscient dera importància deth refugi de Restanca, ei per aquerò qu’a demorat a auer toti es informes tecnics de besonh entà poder assegurar qu’aguest ostiu se podesse balhar eth servici en tot garantir era seguretat e confòrt des usatgèrs” e higie que “en cap moment s’a avalorat o plantejat eth barrament d’aguesta infraestructura”.

Es interessadi a presentar aufèrta tad aguesta licitacion tara  gestion deth refugi pòden participar deman dijaus 19 de junh a compdar des 10:30 ores d’ua visita in situ entà conéisher es installacions der equipament. Era  data limit de presentacion d’aufèrtes se barrarà eth 26 de junh de 2025.

Tota era informacion en ligam: https://contractaciopublica.cat/ca/detall-publicacio/300483545

Vielha, 18 de junh de 2025