• S’a denonciat a sies caçaires furtius e s’an confiscat armes, materiau de caça, e tanben un cèrvi e tres isards.

Membres des Agents de Miei Ambient deth Conselh Generau d’Aran e deth Grop Especiau de Verins e Antifurtivisme deth Còs d’Agents Ruraus deth Departament d’Interior e Seguretat Publica dera Generalitat an amiat a tèrme diuèrsi dispositius planificats e coordenats qu’an permetut denonciar a sies persones implicades en diuèrses accions de caça furtiva en territòri aranés.

Es investigadi caçauen damb un modus operandi fòrça professionau, çò qu’a requerit longui e complèxi seguiments enes zònes nautes deth país entà poder-ne documentar era activitat. Se comprovèc que caçaires locaus facilitauen eth guidatge e era logistica a d’autes persones provenentes de diferenti endrets der estat, principauments entara caça illegau der isard (Rupicapra pyrenaica), un des trofèus cinegetics mès apreciadi der estat.

Hè dues setmanes, dempús de diuèrses jornades de vigilància, ena Val de Toran s’interceptèc a un caçaire locau e a un aute de València. Pendent eth seguiment, es agents observèren com es caçaires auciren a un cèrvi mascle e ua femelha d’isard, dera quau amaguèren eth cap entà poder-lo recuperar mès tard tà non desvelhar sospèites en cas d’inspeccion. En punt de contraròtle establit, s’identifiquèc as dus caçaires e se denoncièc ath locau per capturar un cèrvi sense precinte, e ath forastèr per auer caçat era femelha d’isard sense autorizacion. Era actitud de determinacion e seguretat des infractors indicaue un naut grad d’experiéncia en aguesta practica illegau.

Dies mès tard, deuant de d’autes sospèites de furtivisme, comencèc un aute seguiment de dus caçaires locaus e dus de Ciudad Real. Aguest se hec ena Val de Toran e en zòna de Salient, a on es agents poderen observar com es caçaires forastèrs caçauen isards. Eth contraròtle e era inspeccion deth veïcul permeteren localizar dus caps d’isard caçadi illegaument. Un d’eri non auie precinte e er aute l’auie mau plaçat, çò que n’aurie pogut perméter era manipulacion e reutilizacion. Aguest grop ja hège ans qu’ère jos investigacion per sospèites de caça illegau, e se les atribuís era caça d’aumens 21 isards e 3 cèrvis a compdar de 2017 ena Val d’Aran.

Enes dus operatius s’an confiscat es pèces, es armes e diuèrsi elements utilizadi entara caça furtiva, coma binòcles, visors termics e d’auti instruments.

Eth Tribunau Suprèm establís qu’eth furtivisme pòt constituïr delicte encara que non s’arribe a capturar cap de pèça, sonque peth hèt d’exercir era activitat cinegetica sense autorizacion. Segons era normativa vigenta, aguesti hèts se pòden considerar infraccions de caractèr fòrça grèu, que pòden representar sancions entre 3.001 € e 120.000 €. E es persones denonciades pòden èster expulsades temporaument dera societat de caça corresponenta e pèrder era licéncia de caça enquia cinc ans, hèt que les empedirie caçar en tot Catalonha pendent aguest periòde.

Eth Conselh Generau d’Aran trabalhe amassa damb es societats de caça e pesca entara conservacion e gestion sostenibla dera activitat cinegetica. Aguestes entitats an demanat mès d’un còp un major contraròtle deuant de males praxis, e eth Conselh reïtère era importància que toti es actors implicadi collabòren activament ena deteccion e denóncia d’aguestes conductes entà garantir ua caça responsabla e respectuosa damb era fauna.

Vielha, 18 de noveme 2025