• Eth santuari de Mijaran a acuelhut un an mès er acte institucionau entara commemoracion dera Hèsta d’Aran.

• En acte, s’a hèt eth liurament deth Prèmi 17 de Junh d’enguan ath freerider Aymar Navarro, qu’a representat pendent tota era sua trajectòria esportiva es valors qu’aguesti prèmis simbolizen, per èster ua figura de referéncia ena Val d’Aran e un ambaishador dera nòsta tèrra, non sonque a trauès der espòrt de nhèu, senon damb eth sòn compromís damb eth país.

Eth Conselh Generau d’Aran a tornat a celebrar eth 17 de Junh, era Hèsta d’Aran, damb uns actes que commemòren er aniversari dera restitucion dera maxima institucion aranesa e era recuperacion deth autogovèrn en 1991.

Era sindica d’Aran, Maria Vergés, a presidit era celebracion, acompanhada deth    conselhèr dera Presidéncia, Albert Dalmau, eth secretari generau entath Rèpte Demografic, Paco Boya, conselhères e conselhèrs deth Conselh Generau, alcaldes e d’autes autoritats.

Era sindica d’Aran, Maria Vergés, a destacat.en sòn discors: “eth besonh de qu’eth CGA dèishe d’èster tractat coma ua adminsitracion locau e que, atau e coma mèrque era Lei d’Aran e eth pròpri Estatut d’Automia, se li reconeishe era sua singularitat tanben a nivèu juridic e administratiu”.

N’aguest sens era Sindica a manifestat: “qu’eth govèrn d’Aran negòcie damb era Generalitat entà qu’era maxima institucion aranesa compde damb un modèl de finançament que, per prumèr viatge, balhe estabilitat financèra ara Val d’Aran”.

En motiu d’aguesta celebracion eth Conselh Generau d’Aran a elaborat un video commemoratiu e divulgatiu sus eth teishit sociau e inclusiu d’Aran, que se pòt veir enes hilats dera institucion.

Pendent er acte institucionau s’a hèt eth liurament deth Prèmi 17 de Junh, qu’enguan eth Plen deth Conselh Generau a decidit autrejar, per unanimitat, ath freerider Aymar Navarro, qu’a representat pendent tota era sua trajectòria esportiva es valors qu’aguesti prèmis simbolizen, per èster ua figura de referéncia ena Val d’Aran e un ambaishador dera nòsta tèrra.

Ath long d’aguesti dies e laguens deth hestau dera cultura “TerSon, eth son dera tèrra” s’an amiat a tèrme diferentes activitats culturaus, musicaus e ludiques tà hèr en familha, ena dusau edicion deth hestau programat peth govèrn aranés laguens des actes dera Hèsta d’Aran tà apropar-la ara societat aranesa.

Vielha, 17 de junh 2025