-
Eth dijaus pera tarde ena libreria Era Alquimia e eth diuendres en toti es centres educatius d’Aran, s’expliquèc e repartic eth còmic en aranés d’Ovihuec.
Damb eth propòsit de hèr arribar de forma divulgativa eth projècte d’Ovihuec.dat ara ciutadania, s’a creat un còmic en aranés que narre es aventures des frairs Jòrdi e Ariadna quan vien de Barcelona a visitar as sòns oncles ena Val d’Aran. 
Ena tarde deth dijaus, auec lòc era explicacion dera iniciativa Ovihuec.dat e era presentacion deth còmic ena libreria Era Alquimia ubicada en Vielha. Er espaci acuelhec ad aqueres persones interessades en compréner era importància dera ramaderia extensiva entara prevencion d’incendis e preservacion dera biodiversitat.
Eth cap deth projècte e investigador der IRTA, Toni Dalmau exposèc es beneficis de compdar damb un ramat public en quau non te jògues eth dia a dia, entà poder hèr investigacion e estudiar es cambis en entorn e eth foncionament des naues tecnologies coma es colièrs de geolocalizacion o es barraments virtuaus. 
Londeman, diuendres ath maitin, eth conselhèr de Gestion Ambientau, Transicion Energetica e Innovacion, Oriol Sala, amassa damb es tecniques der IRTA e deth Conselh Generau, presentèren eth còmic ar alumnat de 6au. de primària dera Escòla Garona de Vielha, dera Escòla Loseron d’Arties – ena que tanben participèc er alumnat de Salardú-, e dera Escòla Sant Ròc de Bossòst, qu’acuelhec ara mainadèra de Es Bòrdes e Les.
En acabar, era conselhèra de Coneishement, Angela Cases, amassa damb es tecniques der IRTA e deth Conselh Generau, expliquèc eth projècte e eth còmic ara joenessa de 1èr. dera E.S.O der Institut d’Aran.
En totes es visites as centres educatius, se realizèren jòcs de comprension e participacion entà hè’c çò de mès interactiu possible e fin finau, se regalèc un còmic en aranés a tota era mainadèra. Ua iniciativa qu’a coma objectiu dar a conéisher entre era joenessa era relevància e besonh dera ramaderia extensiva e eth suenh des peishèus en nòste territòri.
Vielha, 3 de març de 2026