- Eth Conselh Generau d’Aran, a trauès deth sòn Departament d’Espòrts e deth projècte CETEI (Centre Especializat en Tecnificacion d’Espòrts d’Iuèrn), anóncie era dubertura des pròves d’accès tath Programa de Tecnificacion Infantila d’Espòrts d’Iuèrn entara sason 2026/2027
Ath delà deth Conselh Generau, aguest programa se desvolòpe amassa damb es clubs deth territòri e a eth supòrt d’institucions e empreses comprometudes damb er espòrt e eth desvolopament joen d’Aran, com Baqueira Beret, INS Aran, Escòla Garona, Ajuntament de Vielha-Palai d’Espòrts, SABS, e de diferenti collaboradors tecnics e patrocinadors deth sector.
Quin ei er objectiu deth Programa?
Eth Programa de Tecnificacion Infantila a coma finalitat acompanhar as joeni esportistes dera Val d’Aran en ua etapa clau dera sua formacion, en tot combinar:
- Desvolopament tecnic e tactic enes espòrts d’iuèrn.
- Formacion fisica adaptada ara edat e ath procès maduratiu.
- Seguiment academic coordinat damb es centres educatius.
- Educacion en valors: esfòrç, compromís, autonomia e trabalh en equipa.
Non ei sonque un programa de naut rendiment, tanben ei un espaci d’acompanhament integrau, a on er espòrt ei ua escòla de vida e a on volem formar persones equilibrades, responsables e capables de créisher damb identitat pròpria.
Ua guardada mès enlà deth projècte CETEI
Aguest programa infantil ei era pòrta d’entrada ath projècte superior deth CETEI, que vò consolidar en Aran un itinerari complet de tecnificacion e acompanhament entàs espòrts d’iuèrn, des categories de basa enquias etapes de major exigéncia competitiva.
Des deth CETEI se vò crear oportunitats reaus entàs joeni deth territòri, retier e potenciar talent locau, generar cultura esportiva e excelléncia damb arraïtzament, trabalhar en hilat damb clubs, familhes e institucions.
Inscripcions
Es persones interessades pòden consultar tota era informacion e formalizar era inscripcion a trauès deth següent ligam:
Des deth Departament d’Espòrts deth Conselh Generau d’Aran encoratjam a totes es familhes e joeni/es interessadi/es a hèr eth pas tà conéisher de prumèra man un programa que vò èster fòrça mès qu’un entrenament, un camin de creishement personau e esportiu.
Vielha, 19 de hereuèr de 2026