- Era trobada a amassat a antics participants des colònies, exmonitors, autoritats, enterpreses collaboradores, juntes locaus, volontaris e volontàries e professionaus tecnics dera entitat qu’an hestejat aguesti 25 damb un seguit d’activitats.
En motiu deth 25au aniversari des colònies d’ostiu dera Val d’Aran, aué dissabte s’a celebrat ua jornada commemorativa ena plaça dera Querimònia de Salardú.
Entre es actes dera jornada, dempús des parlaments institucionaus e actuacions musicaus, s’a cantat era pèça commemorativa tad aguesta 25 au edicion, ara seguida s’a hèt un talhèr de dances araneses e s’a aufrit un aperitiu popular.
Eth 20 de junhsèga passat comencèc era edicion numerò 25 des colònies organizades pera Associacion contra eth càncer en Lleida e era Junta Locau dera Associacion ena Val d’Aran. Ath long d’aguesti ans, es colònies an ajudat a milhorar era qualitat de vida de centenats de mainatges e joeni qu’an agut o passiten aguesta malautia, en tot aufrir-les un espaci d’aprendissatge, proteccion emocionau e convivéncia.
Era sindica d’Aran, Maria Vergés ” A volut méter en valor a totes persones que participen en aguestes colònies pera sua dedicacion e esfòrç entà possar-les de 25 ans ençà” a volut “dar es gràcies as organizadors e organizadores d’aguestes colònies, monitors e monitores e ad aqueres persones que metetz eth vòste graet de sable entà perméter que aqueri mainatges e mainades poguen, pendent ua semana, desconectar d’ua realitat dificila e poder gaudir d’activitats que les amplisque d’energia e felicitat e ara ora conéisher naues amistats”.
A hijut “De deth Conselh Generau contunham damb eth supòrt ad aguesta iniciativa tan de besonh entà toti aguesti mainatges e mainades”
Pendent era setmana, es participants an gaudit d’activitats esportives e de léser coma rafting, jòcs, escape rooms, visita tath casau dera gent grana de Vielha, sessions de relaxacion e d’autes activitats amassa.
Er objectiu des colònies ei milhorar era sua qualitat de vida, afavorir era expression emocionau, era ajuda entre iguals, era autoestima, era independéncia e promòir abituds de vida saludabla.
Entre es activitats desvolopades, i auec ua visita tara unitat canina des Mòssos d’Esquadra, un talhèr tà reconéisher es arrates-caudes e es audèths e un talhèr de soshi que se hec ena aubèrja a on s’an alotjat es mainatges.
Eth projècte, dirigit per ua equipa professionau formada per un director de colònies, monitors titolats, psicològs e quate pediatres oncologics, a compdat damb mès de 20 volontaris.
Deman dimenge, es nauanta sies mainatges e mainades, majoritàriament de Catalonha, mès tanben de Madrid, Màlaga, Sevilla, Burgos e des Canàries, entre d’auti, tornaràn tà casa dempús d’ua setmana de convivéncia. 
Ath long d’aguesti 25 ans, es colònies an compdat damb eth supòrt d’institucions com era Deputacion de Lhèida, eth Conselh Generau d’Aran, Ajuntaments dera Val d’Aran, e eth Col·legi de Farmacèutics de Lleida.
Vielha, 26 de junhsèga 2025