• Eth president deth Parlament, amassa damb es secretàries prumèra, tresaua e quautaua dera Mesa, an mantengut ua trobada damb era sindica d’Aran e es vicesindics deth govèrn aranés ena sedença deth Conselh Generau d’Aran.

Aguest maitin a auut lòc era trobada institucionau entre eth Conselh Generau d’Aran e era Mesa deth Parlament de Catalunya qu’aué a visitat era maxima institucion aranesa.

Era sindica d’Aran Maria Vergés, acompanhada des vicesindics prumèr, Francés Bruna; dusau, Oriol Sala e tresau, Javier Cavero, an recebut aué ena sedença deth Conselh Generau d’Aran era delegacion dera Mesa deth Parlament de Catalunya, entestada peth president dera cramba, Josep Rull, amassa damb es secretàries prumèra, Glòria Freixa; tresaua, Rosa M. Ibarra e quataua, Judith Alcalà.

Pendent era trobada s’an tractat dues qüestions de grana importància entà Aran: per un costat, eth reconeishement explicit a nivèu juridic e administratiu per part deth Parlament de Catalunya dera singularitat deth Conselh Generau d’Aran, entà deishar d’èster considerat coma ua administracion locau, e per un aute costat era modificacion dera normativa vigenta entà possibilitar qu’era compareishença annau dera sindicatura d’Aran en Parlament pogue esdevier un plen especific entà debàter sus era situacion e realitat dera Val d’Aran.

Era sindica d’Aran a remercat “qu’ei de besonh qu’aguesta compareishença non sigue sonque ua accion pedagogica sus çò qué ei Aran, senon tanben un espaci entà que toti es grops parlamentaris poguen presentar propòstes concrètes e solucions tà afrontar es rèptes dera Val d’Aran. Entad açò, ei de besonh ua modificacion puntuau ena Lei d’Aran entà refortir era sua aplicabilitat e reconeishement”.

Per çò que hè ath trabalh qu’eth govèrn d’Aran amie a tèrme entà arténher un reconeishement juridic e efectiu dera singularitat dera Val d’Aran, ja iniciat en Congrès des Deputats, aguest arribarà tanben tath Parlament de Catalunya. N’aguest sens, eth govèrn d’Aran a trasladat ara Mesa eth besonh de qu’aguest reconeishement explicit pogue èster tanben consensuat per part deth pròpri Parlament, qüestion qu’era Mesa trasladarà tanben as grups parlamentaris, en tot mostrat eth sòn compromís entà trabalhar ena incorporacion d’aguesta realitat ath reglament dera cramba.

Era sindica d’Aran a volut “arregraïr era visita dera Mesa deth Parlament, coma ua mòstra de respècte e de normalitat institucionau que permet apropar era nòsta realitat ara cramba catalana en tot perméter auançar ena melhora dera vida dera ciutadania aranesa”.

Vielha, 7 de junhsèga 2025