Era prumèra edicion deth Festival “Mar i Muntanya” amasse era codina dera Val d’Aran damb era de Cambrils

Aguesta prumèra edicion, promoiguda peth Departament de Torisme deth Conselh Generau d’Aran e eth Patronat de Turisme de Cambrils, amasse Catalunya de nòrd a sud, e connècte dus territòris (Cambrils coma mar e era Val d’Aran coma montanha).

Eth Festival Mar i Muntanya amassarà a 6 codinèrs aranesi damb 6 codinèrs de Cambrils entà dialogar sus era codina deth producte en dues etapes: era prumèra, deth 15 ath 30 d’octobre en Cambrils e era segona, der 1 ath 15 de deseme, ena Val d’Aran.

Damb un format de jornades, pendent era sua quinzea, eth restaurant amfitrion aufrirà eth plat estela deth sòn omonim e eth plat de mar e montanha codinat amassa, tà convidar as clients fidèus e as visitants curiosi a descurbir era esséncia dera tradicion dera gastronomia catalana.

Era connexion entre es territòris catalans ei fòrta en sector gastronomic. Eth popular “mar e montanha” ei ua singularitat deth receptari, a on que es ingredients (eth peish o eth marisc entà representar era mar e, generaument, era carn entà representar era montanha) se codinen amassa. Aguesta codina “a quate mans” genère sabors e textures uniques que, ath long des generacions, es catalans perceben coma sabors de confòrt, de casa e de tradicion.

Eth “Festival Mar i Muntanya”, justament, hè aunor ad aguesta particularitat dera codina catalana, sigue basada ena tradicion, ena creacion d’autor o ena revision, perque en aquerò que coïncidissen es creadors e creadores gastronomiques, ei en remercar que Catalunya ei tèrra de producte. Aguesta prumèra edicion, promoiguda peth Departament de Torisme deth Conselh Generau d’Aran e eth Patronat de Turisme de Cambrils, amasse Catalunya de nòrd a sud, e connècte dus territòris (Cambrils coma mar e era Val d’Aran coma montanha) qu’istoricament s’an trobat, damb intercambi des sues localitats per rasons de léser e de sason.

Se celèbre en dues etapes. Era prumèra, ena qu’era Val d’Aran visite Cambrils, se harà deth 15 ath 30 d’octobre en format de jornades, e era segona, der 1 ath 15 de deseme, eth viatge ara invèrsa portarà era codina de Cambrils tara Val d’Aran, seguint eth madeish procediment. Atau, estaque es dus territòris a trauèrs des sòns codinèrs, e amassarà a 6 codinèrs aranesi damb 6 codinèrs de Cambrils: a Rubén Campos (Rincón de Diego, Cambrils) damb Josep Gregorio (El Portalet, Bossòst); a Sergi Palacín (Hiu, Cambrils) damb César Mory (Es Arraïtzes, Garòs); a Xavi Martí (Macarrilla, Cambrils) damb Marc Nus (Era Coquèla, Vielha); a Llorenç Blasco (Denver, Cambrils) damb Montse Solà (Casa Turnay, Escunhau); a Damià Capafonts (Cal Tendre, Cambrils) damb Pere Graupera (Casa Irene, Arties) e a Joan Llaberia (L’Original, Cambrils) damb Pere Tenllado (Casa Rufus, Gessa).

Aguesta hèsta, que celèbre era connexion e era tradicion, ei pensada entà qu’eth comensau ne gaudisque. Es restaurants de Cambrils que i participen auràn ena carta, dehòra dera carta o en menú de degustacion eth plat estela deth sòn restaurant omonim aranés, e tanben un plat creat amassa que reflectís era esséncia dera mar e era montanha, e amasse en un plat es productes des dues tèrres (carn de caça, vedèra, conilh, coja o embotit dera Val d’Aran damb excellent pèish e marisc que ven deth mercat de Cambrils, damb baudròia, lobina, gambes o langostines).

Es propòstes creades pes dotze codinèrs son suculentes: un moth de vedèra de Les damb gamba blanca de Cambrils (Macarilla – Era Coquèla), un calamar damb pès de pòrc (Denver – Casa Turnay), era lobina damb coja, safran, comquat e mandonguilhes de sèpia e bolh (Rincón de Diego – El Portalet), un ceviche “peró-thai” de cèrvi e gamba (Hiu – Es Arraïtzes), e tradicionaus com eth conilh farcit de cargòlhs damb lom de baudròia e chuc deth sòn rostit (Cal Tendre – Casa Irene) o eth canelon de coa de taure damb langostines (L’Original – Casa Rufus). Per descompdat, ena sua escala ena Val d’Aran, es restaurants aranesi aufriràn eth plat deth “sòn” restaurant de Cambrils e eth plat de mar e montanha amassa.

Cambrils ja ei prèst entà aufrir aguesti 12 plats (6 d’eri, inedits) en un format de jornada a on se convide as locaus e as visitants a gaudir des milhors causes deth territòri: era codina elaborada damb producte locau dera sason, que celèbre era tradicion e eth territòri damb minjars saborosi.

Vielha, 18 de seteme de 2025