Eth Conselh Generau d’Aran, a trauès deth sòn patronat de promocion toristica, Foment Torisme Val d’Aran, a estat present, aguest mes d’octobre, ena Adventure Travel World Summit (ATWS) que s’a hèt en Chile, qu’ei era principau amassada mondiau deth torisme d’aventura, organizada pera Adventure Travel Trade Association (ATTA). Ath long de 4 dies auem participat en diuèrses activitats de promocion, escambi professionau e posicionament internacionau dera destinacion.

Era ATTA ei ua organizacion globau qu’agrope a mès de 1.300 membres —entre destinacions, operadors toristics, lotjaments e mejans especializats— damb er objectiu d’impulsar un torisme d’aventura responsable, sostenible e basat en respècte pes comunitats locaus e er entorn naturau.

Era sua conferéncia annau, era Adventure Travel World Summit, ei eth punt de trobada de referéncia entàs caps deth sector, agéncies e destinacions comprometudes damb un modèl toristic de naut valor hijut.

Pendent era amassada, era Val d’Aran presentèc era sua estratègia de torisme sostenible e de natura, centrada ena preservacion der auviatge naturau e culturau, era diversificacion dera aufèrta pendent tot er an e era collaboracion damb es agents locaus entà promòir un desvolopament equilibrat deth territòri. Era participacion ena ATWS a permetut refortir era imatge dera Val coma ua destinacion de montanha autentica, en ua clara apòsta pera qualitat e era sostenibilitat.

“Èster part d’un eveniment d’aguestes caracteristiques mos permet plaçar era Val d’Aran en panorama internacionau deth torisme responsable e compartir experiéncies damb destinacions de tot eth mon qu’apòsten per un modèl toristic mès conscient e respectuós damb eth Miei Ambient”, segontes eth conselhèr de Torisme, Josep Canut.

Era preséncia dera Val d’Aran ena ATWS s’enquadre ena estratègia d’internacionalizacion dera destinacion e refortís eth sòn compromís damb es bones practiques impulsades pera ATTA en matèria de sostenibilitat, innovacion e cooperacion entre territòris.

Vielha, 31 d’octobre 2025