Eth Conselh Generau d’Aran, a trauès der Airau d’Espòrts e des Servicis Assistenciaus de Benèster e Salut (SABS), impulse era projeccion deth documentau Sustraiak, ua iniciativa dubèrta ara ciutadanetat que vò restacar era importància de generar espacis compartidi de reflexion, dialòg e coesion sociau en nòste territòri.

Era prepausa nèish pr’amor des amassades de trabalh entre eth Conselh Generau d’Aran, eth SABS e er Ajuntament de Vielha e Mijaran, damb era volontat comuna d’impulsar accions que connècten es politiques sociaus, educatives e esportives, e que contribuïsquen a hèr dera Val d’Aran un territòri mès inclusiu, equitatiu e coesionat.

En aguest contèxte, era projeccion de Sustraiak —un documentau que tracte sus es arraïtzes, era identitat e es procèssi vitaus de persones en contèxtes diuèrsi— se plantege coma ua oportunitat entà generar consciéncia collectiva e favorir espaci de debat e escambi d’experiéncies entre era ciutadanetat. Era iniciativa se complète damb era possibilitat d’apropar aguest contengut tanben as joeni, en collaboracion damb er INS d’Aran, entà refortilhar eth sòn impacte educatiu e preventiu.

Mès enlà dera pròpia projeccion, aguesta accion vò méter en valor eth papèr transformador der espòrt e dera montanha coma vertadèrs hilats de coesion sociau. En territòris coma era Val d’Aran, er espòrt ei fòrça mès qu’ua practica fisica: ei un espaci de trobada, d’inclusion e de construccion comunitària, a on es persones pòden compartir valors coma eth respècte, era solidaritat, eth trabalh en equipa e era superacion personau.

Er espòrt actue coma un element vertebrador dera societat, en tot facilitar era integracion de persones de procedéncies, cultures e realitats diuèrses, e en tot generar oportunitats reaus d’igualtat. Ath madeish temps, era sua vinculacion damb era montanha e eth miei naturau refortilhe eth sentiment d’arraïtzament ath territòri e era responsabilitat collectiva de suenh e preservacion.

Era conselhèra de Joenessa, Igualtat e Inclusion Sociau, Maria Menis, a remercat qu’ «aguest tipe d’iniciatives mos permeten apropar-mos ara ciutadanetat d’ua manèra dirècta e umana, en tot dar votz a realitats diuèrses e en tot trabalhar entà ua Val d’Aran mès justa, inclusiva e liura de discriminacions. Era participacion e era escota activa son claus entà bastir politiques publiques que responguen as besonhs reaus dera gent».

Eth conselhèr d’Espòrts, Javier Cavero, a soslinhat que «er espòrt ei un des grani motors de transformacion sociau deth nòste territòri. A trauès dera practica esportiva e deth contacte damb era montanha, podem generar oportunitats, trincar barrères e refortilhar es ligams entre persones, en tot bastir ua societat mès coesionada e damb mès igualtat d’oportunitats entà totes e toti».

Damb aguesta iniciativa, eth Conselh Generau d’Aran reafirme eth sòn compromís damb era promocion dera igualtat, era inclusion e era convivéncia, en tot apostar per projèctes que combinen cultura, espòrt e accion sociau coma hilats entà transformar positivament eth territòri.

Eth documentau serà dubèrt ara ciutadanetar de forma gratuïta eth propèr 17 d’abriu tàs 19:00 ores en Audiovisuau de Vielha, enquiar acabament des places der aforament.

Era projeccion ei dubèrta ath conjunt dera ciutadanetat e s’inscriu laguens d’un trabalh mès ample entà fomentar ua societat mès participativa, respectuosa e inclusiva, a on totes es persones agen era oportunitat de formar-ne part en condicions d’igualtat.

Vielha, 13 d’abriu de 2026