• Ua iniciativa deth Conselh Generau d’Aran, a trauès deth sòn Plan de Sostenibilitat Toristica.

Era Val d’Aran compde des d’aué damb un nau esturment de promocion toristica: era Ruta Selfie, un recorregut format per nau punts estrategics despartidi per tot eth territòri, equipadi damb supòrts dessenhadi entà hèr fotografies damb eth telefonet e plaçadi en punts de facil accès e segurs.

Aguesta iniciativa, impulsada peth Conselh Generau d’Aran a trauès deth sòn Plan de Sostenibilitat Toristica, vò refortilhar era preséncia dera destinacion enes hilats sociaus e aufrir ua naua experiéncia entàs visitaires.

Es punts escuelhuts entà formar part d’aguesta ruta son quauqui des lòcs mès representatius dera Val d’Aran, com eth guardader de Beret, Montgarri, Uelhs deth Joèu, guardader deth Portilhon, guardader de Canejan, Lacs de Colomèrs, Bassa d’Oles e Vilamòs, coma itineraris visuaus.

Segontes eth conselhèr de Torisme, Josep Canut, “aguesta accion respon ara naua manèra de viatjar deth torista digitau, qu’aué compartís es sues experiéncies en temps reau. Apostam per ua prepausa qu’ei en consonància damb es tendéncies actuaus e que refortilhe era imatge dera Val d’Aran coma ua destinacion atractiva, viva e connectada.”

Cada punt incorpòre un còdi QR que, ath delà de facilitar informacion sus era zòna, enriquís era experiéncia deth visitaire. Aguesta prepausa convide ar usatgèr a capturar eth moment, a compartir-lo enes hilats e a dar a conéisher eth patrimòni naturau e culturau aranés de manèra activa e participativa.

Vielha, 20 de mai de 2025