Era Val d’Aran renauís eth sòn reconeishement coma Destinacion Toristica Intelligenta Aderida

junhsèga 13, 2025 Cabecera, Cultura, Govèrn, Innovacion, Miei Ambient, Notícies, Promocion economica, Slider, Torisme

  • Eth territòri reafirme eth sòn compromís damb era innovacion, era sostenibilitat e era milhora continuada dera gestion toristica.

Eth Conselh Generau d’Aran renauís eth distintiu de Destinacion Toristica Intelligenta (DTI) Aderida, dempús de superar damb èxit eth procès de revision impulsat pera Secretaria d’Estat de Torisme, a trauèrs deth programa DTI gestionat per SEGITTUR. Eth renauiment confirme eth compromís deth territòri damb un modèl toristic basat ena sostenibilitat, era innovacion, era tecnologia e era accessibilitat.

Eth nau reconeishement, damb ua vigéncia de dus ans, implique era continuitat deth procès de milhora continuada, revisant objectius e estratègies entà adaptar-se as naui besonhs der entorn. Era avaloracion recenta, compausada per 97 requisits e 261 indicadors, a permetut actualizar eth diagnostic iniciau e elaborar un plan d’accion qu’orientarà es futures actuacions deth destin.

Des dera sua integracion en Hilat de Destinacions Toristiques Intelligentes en 2019,  era Val d’Aran a mostrat ua clara apòsta pera transformacion toristica.

Eth programa DTI, promoigut pera Secretaria d’Estat de Torisme e gestionat per SEGITTUR, cèrque d’aumentar era competitivitat des destinacions e consolidar un modèl toristic mès resilient, sostenible e inclusiu.

Era Val d’Aran continue posicionant-se coma referent ena aplicacion de modèls toristics intelligents e sostenibles en entorn de montanha.

Comments are closed.