• Eth Conselh Generau d’Aran a presentat ua naua edicion der Ostiu Culturau a on, aguest mes d’agost i prenen part es quate grops de dances e musica aranesi.

Un an mès torne era dança e musica tradicionau aranesa entà aumplir era sason d’ostiu damb interpretacions que son ua mòstra deth folclòre e cultura deth nòste territòri.

Pendent eth mes d’agost, deth 8 enquiath 31, era Còlha de Santa Maria de Mijaran, Es Sautarèths de Bossòst, Es Fradins de Vielha,  e Es Corbilhuèrs de Les, interpretaràn eth sòn repertòri de dances ath long dera Val d’Aran.

Ena programacion d’enguan, era Còlha de Santa Maria de Mijaran daurirà eth programa en Les, eth dia 8 d’agost, tàs 19 ores, Es Sautarèths de Bossòst seràn en Vilac eth 23 d’agost, tàs 19 ores, Es Fradins de Vielha dançaràn eth 28 d’agost en Arties, tàs 19,30 ores e Es Corbilhuèrs de Les barraràn en Vielha eth 31 d’aguest mes, tàs 19 ores.

Damb aguesta naua edicion se vò apropar as visitaires es dances e era musica tradicionaus entà potenciar atau eth coneishement dera cultura d’Aran.

Vielha, 4 d’agost 2025