• Coma dejà ei tradicionau cada 4 de deseme, eth Conselh Generau d’Aran a organizat aué ua jornada commemorativa entà méter en valor eth servici ara comunautat que prèste eth còs de Pompièrs d’Aran, rebrembant qu’a compdar der 1 de gèr de 2023, er airau d’emergéncies començaue a foncionar de forma autonòma.

• Pendent er acte institucionau, s’a amiat a tèrme er autrejament de mencions aunorifiques, que distinguissen era sua trajectòria laguens deth sistèma d’Emergéncies dera Val d’Aran.                   

Aué, s’a celebrat era tradicionau hèsta de Santa Barbara, patrona des Pompièrs d’Aran, ua jornada qu’a estat presidida pera sindica d’Aran, Maria Vergés, eth Major des Pompièrs, Manel Bosch, e era directora generau de Prevencion, Extincion d’Incendis e Sauvament dera Generalitat, Tamara García de la Calle.

Aguesta hèsta a començat, coma dejà ei tradicionau, damb es tòcs de sirèna e era passejada des veïculs des Pompièrs per diuèrsi pòbles dera Val d’Aran, en tot contunhar dempús damb era missa en aunor a Santa Barbara prèvia ar acte institucionau, qu’a començat damb ua minuta de silenci en rebrembe des Pompièrs que mos an deishat.

Ara seguida, a auut lòc er autrejament  des mencions aunorifiques e des medalhes d’aunor, uns guerdons que distinguissen era trajectòria des pompièrs a qui se concedissen en foncion des ans d’antiquitat e des servicis excepcionaus realizadi. En totau, s’an concedit cinquanta ua medalhes as nòsti pompièrs e pompières.

Enes parlaments oficiaus, era sindica d’Aran a volut destacar que: “ara auem divèrsi encastres a on mos cau trebalhar coma era estabilizacion dera plantilha, era definicion deth plan director qu’à d’èster era huelha de rota que mos permeterà eth desplegament efectiu de traspàs damb es negociacions pertinentes damb eth departament d’Interior dera Generalitat, inversions, licitacions e ampliacion deth parc de Vielha vinculada ar increment deth personau que supòse tanben un increment d’espacis e ua professionalizacion deth personau”.Higie a mès: “Tanben qüestions intèrnes importantes coma era definicion dera carrèra de Pompièrs e Emergéncies, que dongue vision as persones qu’entren laguens deth sistèma dera longada dera sua activitat laborau, ath delà de d’autes qüestions laboraus que se negòcien damb es representants des trebalhadors”. “Des deth Conselh Generau d’Aran  volem, en definitiva, sajar de consolidar aguest modèl, aguesta ei era nòsta huelha de rota tad aguest 2026”, a soslinhat.

Entath Major de Pompièrs Emergéncies d’Aran, Manel Bosch: “ Ara ei moment de constatar e reformar  aguestes qüestions que pendent aguesti tres ans an foncionat ben e d’autes que s’an de retocar. De cara ath 2026, trebalharam ena fasa formativa, dejà fòrça auançada, tanben  ena consolidacion dera plantilha damb ua formacion mès especifica en un an damb dificultats pr’mor que mos auem trapat  damb servicis que enquiara non se corbíen e ara son part d’ua realitat”. E ad açò higie que “en aspèctes de supòrt estructurau, er aqueriment dera naua autoescala, en tràmits d’execucion, supausarà un increment d’excelléncia mès naut qu’eth qu’auem actuaument”.