• Deth Conselh Generau d’Aran ençà vos convidam a participar enes diuèrsi actes organizadi dera maxima institucion aranesa e d’autes institucions deth territòri ençà damb motiu deth Dia Internacionau dera Eliminacion des Violéncies Masclistes

Eth dissabte, 25 de noveme, se celèbre eth Dia dera Eliminacion des Violéncies Masclistes. Ua lacra sociau que, sonque en çò que va d’an, a deishat dejà mès d’ua cinquantia d’hemnes assassinades a mans des sues parelhes o ex parelhes en Espanha.

Eth Conselh Generau d’Aran, a trauès deth sòn Servici entàs Drets des Hemnes e Persones LGTBIQ+, a organizat tot un seguit d’actes e activitats entà mostrar eth sòn compromís damb era luta pera igualtat e era eradicacion dera violéncia masclista.

“Entath govèrn d’Aran, aguest ei un ahèr de vitau importància e en que trabalham ath long de tot er an damb ua sèria d’actuacions en matèria de formacion, prevencion e coordinacion damb d’auti estaments implicadi, pr’amor que volem hèr front ara lacra que supausen es violéncies masclistes entà poder auançar entà ua societat mès justa e igualitaria”, afirmaue era sindica d’Aran, Maria Vergés.

D’autes institucions e estaments deth territòri an organizat tanben un seguit d’actes entà higer-se ad aguesta luta.

Podetz consultar totes es activitats e eth programa complèt en pannèu que vos compartim!