Eth Conselh Generau d’Aran signe un convèni damb «Telefónica», e era companhia telefonica aportarà 200.000€ ara Val d’Aran

telefonica-conselh

Eth sindic d’Aran, Carlos Barrera, e es representants de Telefónica, Ramiro Sánchez de Lerín e Joaquín Faura, an signat un convèni entà establir es condicions que regiràn era collaboracion de TELEFÓNICA destinada as fins qu’a previst realizar eth Govèrn deth Conselh Generau d’Aran.

Eth Conselh Generau d’Aran a interès ena elaboracion e implementacion d’un plan tecnologic damb er objectiu de promòir eth desvolopament sostenible deth hilat empresariau dera Val d’Aran, en tot cercar er equilibri economic entre es sues diferentes zònes (Naut Aran, Mijaran e Baish Aran) en tot profitar era potencialitat de projèctes e sectors estrategics coma es orientadi ara salut, ar agroalimentari, era energia e, en definitiva, eth miei ambient a trauès d’energies renovables, es TIC o d’auti sectors que poguen sorgir e desvolopar-se en un futur, en tot impulsar era competitivitat locau, e en tot estimular era cooperacion interadministrativa en un entorn globau mejançant eth foment dera innovacion e es activitats d’I+D+i e era sua implementacion es empreses sense experiéncia prealabla, mès tanben propiciar ua I+D+i mès de major intensitat entre es actors experimentadi deth territòri, a trauès d’un major foment dera cooperacion entre es diuèrsi agents, tant en encastre locau, coma supralocal e damb era integracion d’un sistèma public-privat.

Tot açò en marc de promòir e exigir per part dera empresa collaboradores ua contribucion activa e volontària ara melhora sociau, economica e ambientau, damb er objectiu de melhorar era situacion competitiva e valorativa e eth sòn valor ahijut.

TELEFÓNICA, S.A. e TELEFONICA D’ESPAÑA, S.A.U. collaborarà damb eth Conselh Generau d’Aran mejançant era inversion enes infrastructures e accions d’operacions ena Val d’Aran: installacion de 4 nòdes LTE (Baqueira CT, Baqueira contienedor, Beret EB e Salardú) per un impòrt conjunt equivalent a 110.000€.

Tanben invertirà enes infrastructures ara fin de melhorar es prestacions deth hilat mobil en tram Vielha- Bossòst- Les, entad açò se connectaràn es estacions base de Vilamòs e Montcorbau ath hilat a trauès de fibra optica, per un impòrt equivalent a 40.000€.

Ath delà, TELEFÓNICA, S. A., realizarà ua aportacion economica en favor deth Conselh Generau d’Aran per impòrt de 50.000 èuros, destinada ara melhora des refugis de montanha dera Val d’Aran, atau coma des sòns sistèmes de comunicacions entà previer era incidéncia que sigue.

En paraules deth sindic d’Aran, Carlos Barrera, “eth Conselh Generau demore que damb aguestes inversions se materialize ua melhora enes infrastructures entà evitar es talhs de servici e garantir era excellència tant entàs vesins dera Val d’Aran com entath foncionament des empreses e comèrci”.

Eth conselhèr d’Administracion Publica, Finances e Coneishement d’Aran, Luís Carlos Medina, a ahijut “era signatura d’aguest convèni patentize era volontat dera companhia Telefonica d’invertir e melhorar enes sues infrastructures enes territòris de montanha. Demoram qu’age un efècte immediat”.

Comments are closed.