• Aguesta iniciativa permet as persones que viuen soletes, socializar e participar d’activitats dirigides per professionaus, sense auer-se de botjar de casa. 

Aran Salut a metut en marcha eth projècte “Casau on line”, que vò milhorar era socializacion dera gent grana aranesa damb activitats a distància, tàs que non cau auer sonque television e connexion a Internet. Er Airau de Servicis Sociaus s’encuede dera installacion des aparelhs que hèn possibla era connexion.

Ei adreçat a persones que son en situacion d’isolament, que per manca d’autonomia fisica an de demorar en casa e an trincat eth sòn hilat de relacions sociaus.

“Son persones d’edat auançada, e çò que volem ei sajar que mantenguen relacions, e a trauès d’aguesta tecnologia, que mos semblèc qu’ère un sistèma facil entàs persones granes, se pòden connectar e de bèra manèra auer relacion damb d’autes persones e participar d’activitats guidades pes professionaus”, soslinhe era directora Eugenia López.

Aguesta accion se hè es deluns, dimèrcles e diuendres entà meddia, damb era interaccion dera professionau qu’impartís cada ua des activitats.

I a diferenti perfils professionaus: ua educadora sociau, especializada en gent grana, era terapèuta ocupacionau, era psicològa, e era integradora sociau, organizen es activitats e atien es preferéncies des usatgères.

“Cambiam es tèmes en foncion des sòns interèssi… talhèrs de codina, d’educacion fisica, de mobilitat, tanben d’estimulacion cognitiva, a trauès de jòcs e activitats diuèrses”, detalhe Gemma Martín, coordinadora deth Servici d’atencion domiciliària.

Actuaument i a 7 hemnes que participen en Casau on line.

Vielha, 12 de març de 2026