Eth Conselh Generau d’Aran, vie d’aprovar era convocatòria d’ajudes destinades a espleites ramadères e apicòles plaçades en zònes de montanha damb dificultats especiaus entar an 2024. Aquera mesura, que cèrque d’aleugerir es efèctes derivadi des dificultats economiques e naturaus en aqueres espleites, includís un conjunt de linhes d’ajudes entar objectiu de garantir era sostenibilitat e era seguretat des sectors afectadi per condicions advèrses.

Es bases que regulen aguesta convocatòria especifiquen un conjunt d’ajudes que seràn distribuïdes en diferentes linhes d’actuacion, coma eth supòrt ath manteniment des mesures de proteccion deth bestiar, compensacion per damnatges derivadi d’atacs de carnivòrs e supòrt a materiau de proteccion de besonh entara defensa des espleites.

Entà Francesc Bruna, conselhèr de Territòri, Paisatge e Cambi Climatic deth Conselh Generau d’Aran “eth principau objectiu d’aguesta convocatòria ei aufrir ua responsa eficaça ad aqueres espleites que, degut as condicions geografiques e es dificultats dera montanha, afronten grèus problèmes entà mantier era sua activitat”. Eth Conselh Generau d’Aran vò, damb aguestes ajudes,  garantir era viabilitat d’aguesti sectors economics clau entara coesion sociau e economica deth territòri.

Eth periòde des compensacions comprenerà tot eth 2024, a compdar der 1 de gèr de 2024 enquia finaus d’an, eth 31 de deseme de 2024.

Tota era informacion se pòt consultar eth web deth Conselh Generau d’Aran en www.conselharan.org.

Vielha, 02 d’octobre de 2025