• Enguan era tematica deth talhèr a estat “La geodiversitat i el risc per a la gestió de les zones de muntanya”.

Era Val d’Aran acuelhec aguesta setmana eth talhèr “La geodiversitat i el risc per a la gestió de les zones de muntanya”, ua jornada centrada ena valorizacion d’aguesti espacis, tant deth sector public com dera iniciativa privada.

Era activitat compdèc damb era participacion des alumnes deth Màster Universitari de Gestion d’Airaus de Montanha dera Universitat de Lhèida (UdL), damb era collaboracion dera Universitat Autònoma de Barcelona (UAB), era Universitat de Barcelona (UB), era Universitat de Girona e era Universitat Rovira i Virgili.

Eth talhèr se desvolopèc ena Val d’Aran coma territòri d’estudi pera sua riquesa geologica, ambientau e paisatgistica, e tanben pes rèptes que supause era gestion sostenibla d’un país de montanha damb naut valor naturau e culturau.

Era sindica d’Aran, Maria Vergés, remerquèc era importància d’aguestes iniciatives formatives, que permeten establir sinèrgies entre eth mon academic e es institucions deth territòri, e soslinhèc eth compromís deth Conselh Generau d’Aran damb era coneishença, era recèrca e eth desvolopament sostenible dera Val d’Aran.

Aguest talhèr compdèc damb es intervencions deth geològ deth Centre de Lauegi deth Conselh Generau d’Aran, Jordi Gavaldà, e de d’auti professionaus restacadi damb era gestion deth territòri, que compartiren es sues experiéncies e punts d’enguarda sus es sòns airaus damb es participants. Se hec ua presentacion des risqui geologics ena Val d’Aran e, en especiau, ua explicacion deth foncionament deth Centre de Lauegi deth Conselh Generau d’Aran. Juan Antonio Sánchez (cap de guàrdia), hec era presentacion dera Sala de Contròl d’Aran e, finaument, se hec ua presentacion dera gestion deth Patrimòni Minèr dera Val d’Aran.

Tanben sigueren presents en aguesta jornada es professors impulsors deth projècte: Joan Ganau (UdL), Montserrat Salvà-Catarineu (UB) e Albert Pèlachs (UAB), responsables dera coordinacion academica deth talhèr.

En contèxte deth màster se desvolòpe un talhèr practic a on es estudiants analisen es oportunitats e es rèptes qu’aufrís eth patrimòni naturau e culturau de diuèrsi territòris deth Pirenèu, damb er objectiu de hèr prepauses realistes que permeten compatibilizar era conservacion deth territòri damb eth sòn desvolopament socioeconomic.

Eth Màster Universitari en Gestion d’Airaus de Montanha a coma finalitat formar professionaus especializadi ena gestion sostenibla des espacis de montanha, capables d’aportar solucions innovadores e viables, de trabalhar e liderar equips interdisciplinaris en organismes publics e entitats privades, e de fomentar iniciatives d’emprenedoria damb ua perspectiva locau e globau.

Vielha, 17 de gèr de 2026