• Er objectiu passe per aufrir es airines e recorsi de besonh tà milhorar eth supòrt as professionaus implicadi en situacions de crisi derivades dera violéncia de genre.

Es servicis Territoriaus d’Igualtat e Feminisme der Alt Pirenèu e Aran an organizat, en collaboracion damb eth Conselh Generau d’Aran, ua session formativa adreçada as agents activadors qualificats deth Servei d’Intervenció en Crisi (SIC) ena Val d’Aran a on i a assistit era conselhèra d’ahèrs sociaus, Maria Menis.

Er objectiu dera jornada a estat promocionar airines e recorsi entà milhorar eth supòrt as professionaus qu’intervien en situacions de crisi derivades dera violéncia masclista e a compdat tanben damb membres des Servicis assistenciaus Aran Salut, Pompièrs Emergéncies d’Aran, Servicis Sociaus e educatius e Mossos d‘Esquadra.

Era formacion a permetut as participaires aquerir coneishements actualizats e practiques efectives entà afrontar e gestionar adequadament es situacions de violéncia masclista, damb er objectiu de garantir ua intervencion efiçienta e de qualitat. A trauèrs d’aguesta iniciativa, se vòlen refortilhar es capacitats des agents activadors deth SIC, aufrint-les airines utiles e ua major preparacion deuant d’aguestes situacions tan complèxes.

Entara conselhèra d’ahèrs sociaus, Maria Menis: “era collaboracion entre es Serveis Territorials d’Igualtat i Feminisme e eth Conselh Generau d’Aran mèrque eth compromís damb era formacion contínua des professionaus que trebalhen ena luta contra era violéncia de genre, e remèrque era importància de crear un hilat de supòrt solid e ben coordinat entà atier es besonhs des victimes ena Val d’Aran”.

Damb aguesta accion, el Serveis Territorials e eth Conselh Generau trebalhen amassa entà afavorir un entorn segur e de supòrt a totes es persones afectades pera violéncia masclista en territòri.

Vielha, 07  de mai de 2025