- Aguest acòrd renauís eth signat en 2022 en tot doblar era quantitat qu’apòrte er Estat respècte der anterior
- Eth MITECO destine n’aguest acòrd 500000 euros entà quate ans, as qu’eth Conselh Generau d’Aran n’i higerà 200.000€ mès
Aguest maitin a auut lòc ena sedença deth Conselh Generau d’Aran era signatura per part deth Secretari Generau tath Rèpte Demografic, Paco Boya, e era sindica d’Aran der acòrd entar impuls deth Centre d’Innovacion Territoriau HèPic e des projèctes innovadors qu’aguest trabalhe entà prebotjar er emprenediment en nòste territòri atau coma era fixacion e retencion de talent.
HèPic, que forme part der Hilat de CIT present dejà en un vintenat de territòris en tota España, a dejà impulsat era metuda en marcha de detzees d’iniciatives empresariaus en tot eth territòri, en afavorir ere generacion d’emplec de qualitat. Atau madeish, damb er objectiu d’acompanhar ara populacion e as projèctes que se despleguen en Aran en matèria d’energia e abitatge, acuelh tanben era Oficina de Transicion Energetica.
Eth Secretari Generau, Paco Boya, expressaue que “ era Val d’Aran siguec des prumèr territòris der Estat en desvolopar ua estratègia ar entor dera innovacion e era aportacion qu’ara hèm damb aguest nau acòrd volem que permete seguir daurint camin en ecosistèma creat qu’ajude a seguir impulsant cambis ena economia d’Aran” e higie “enguan, eth MITECO a doblat era aportacion ath Conselh Generau d’Aran entà arténher aguesti objectius”.
Entara sindica d’Aran, Maria Vergés, “aguest acòrd ajudarà a consolidar era apòsta deth Conselh Generau pera innovacion entà accions e projèctes que permeten eth desvolopament socioeconomic deth territòri”.
Es Centres d’Innovacion Territoriau coma HèPic son espacis estrategics des que se fomente era collaboracion entre eth sector privat e eth public, era societat civila e es centres de coneishement, coma es universitats, damb er objectiu d’arténher ua màger equitat territoriau a trauès deth refortiment deth teishit socieconomic. Son impulsadi pera Secretaria Generau tath Rèpte e cerquen potenciar era innovacion en tot emparar es iniciatives que dejà s’amien a tèrme.
Vielha, 16 de junh 2025