• Era Sindica d’Aran, Maria Vergés, assistie eth passat deluns ar acte de constitucion d’aguest ens en qu’eth Conselh Generau d’Aran entre a formar coma membre de plen dret, damb vòt e votz, en tot representar a un territòri damb lengua oficiau laguens de Catalunya, qui ei tanben representada pera Generalitat de Catalunya. 

• Formar part d’aguest Conselh des Lengües Oficiaus refortís eth papèr d’Aran coma referent ena proteccion, promocion e normalizacion der aranés, lengua pròpria deth país e oficiau en Catalunya.

Eth Conselh Generau d’Aran a entrat a formar part deth Conselh des Lengües Oficiaus, en tot representar ara lengua pròpria d’Aran, coma lengua oficiau tanben en Catalunya.

Era sindica d’Aran, Maria Vergés, participaue aguesta setmana ena session constitutiva deth Conselh des Lengües Oficiaus, qu’auec lòc en Palai de Miramar de Sant Sebastian.

Eth Conselh des Lengües Oficiaus d’Espanha, possat des deth Ministèri de Politica Territoriau der Estat, ei un òrgan colegiat d’analizi, impuls e coordinación técnica dera Administracion Generau der Estat en relacion damb er emplec des lengües oficiaus, damb er objectiu d’arténher eth melhor cumpliment des exigéncies juridiques derivades dera Constitucion Espanhòla, es estatuts d’autonomia e era rèsta de normativa vigenta e aplicabla ena matèria, atau coma des acòrd internacionaus assomidi per Espanha en matèria de lengües oficiaus e es conseqüents drets lingüistics dera ciutadania ena Administracion Generau der Estat.

Es foncions d’aguest Conselh son, entre d’autes, servir de punt d’enlaç en matèria politica lingüistica entre era Administracion Generau der Estat e es òrgans competents des comunautats autonòmes.

Era sindica d’Aran, Maria Vergés, a soslinhat “era importància de formar part d’aguest nau espaci de cooperacion com ua oportunitat entà refortir era preséncia der aranés en toti es encastres e entà contribuïr activament ara diversitat lingüistica e culturau deth país, atau coma dar a conéisher era realiat lingüistica dera Val d’Aran”.

Vielha, 6 de noveme de 2025