Eth Conselh Generau d’Aran hè un pas mès entara preservacion e melhora des equipaments de nauta e mieja montanha damb ua inversion destinada ara melhora des pòrtes deth refugi de Colomèrs. Aguesta accion a coma objectiu refortir era seguretat, afavorir era eficiéncia energetica e hèr des installacions un espaci mès sostenible e adaptat as condicions climatiques deth territòri.

Aguesta inversion s’inscriu ena volontat fèrma deth Govèrn d’Aran de conservar e hèr a créisher er immens patrimòni naturau e es infrastructures que representen es refugis pirenencs, ua pèça clau entar accès segur tara montanha e entara promocion d’un torisme responsable.

Part d’aguesta inversion ei possibla gràcies ath projècte DESIR-POCTEFA, adreçat ara melhora dera connexion, dera gestion e dera sostenibilitat des refugis pirenencs. En aguest contèxte s’includís era intervencion tà melhorar eth desvolopament economic e responsable des refugis deth Pirenèu laguens deth projècte POCTEFA DESIR. Tota era informacion oficiau deth projècte se pòt consultar en: www.poctefa-desir.com.

Er equipament renovat permeterà un melhor isolament, un consum energetic mès eficient e un entorn mès segur e confortable entàs usatgèrs e trebalhadors, en tot contribuir ar objectiu comun de preservar era montanha coma un espaci viu, segur e pleament integrat enes estratègies de sostenibilitat deth territòri.

Eth Conselh Generau d’Aran contunharà trabalhant entà melhorar e modernizar es refugis dera Val d’Aran, entà garantir qu’aguesti equipaments estrategics formen part d’un patrimòni naturau e culturau que definís era nòsta identitat collectiva.

Vielha, 13 de deseme 2025