• Jos eth nòm “Ací ne didem” aguesta campanha preten, d’ua forma propèra e actuau, méter en valor er emplec dera lengua pròpria d’Aran.

• Atau madeish, s’a presentat tanben era marca  “En aranés, òc”, un label qu’acompanharà totes es publicacions ar entorn dera lengua e qu’aproparà er aranés ara poblacion.

Ager auec lòc, ena sedença deth Conselh Generau d’Aran, er acte de presentacion dera naua marca jos era qu’era s’amiaran a tèrme totes es accions de normalizacion dera lengua: “En aranés, òc”.

Eth Conselh Generau d’Aran a trebalhat en un plan de comunicacion a dètz ans vista entà poder establir un calendari d’accions contunhades entà prebotjar er usatge e eth coneishement dera lengua autant entre es persones neishudes o establides en Aran de hè fòrça ans, coma entre es persones nauvengudes e tanben aqueres que mos visiten de forma puntuau.

Era marca qu’englòble totes aguestes accions ei “En aranés, òc” que dejà se pòt trobar en toti es hilats sociaus deth Conselh Generau d’Aran e En Aranés, atau com ena web aranes.org

Era prumèra d’aguestes accions ei era campanha “Ací ne didem” que cerque apropar era nòsta lengua a trauès de diferenti mots en aranés, acompanhadi per ua imatge e er equivalent as autes dues lengües oficiaus deth territòri, eth catalan e eth castelhan.

Aguesta campanha, que se compartirà a compdar dera setmana que ven enes hilats sociaus, e que se poderà enténer tanben enes ràdios deth territòri e veder-se format fisic en diuèrsi punts dera Val d’Aran, a coma objectiu dar a conéisher un vocabulari basic en aranés e apropar era lengua ad aqueres persones que non la coneishen encara. Atau, presentam paraules coma “audèth”, “huec”, “hièstra”, “hemna” o “nhèu”, entre d’autes.

Entà qu’era poblacion dera Val d’Aran pogue conéisher milhor aguesta campanha, eth Conselh Generau d’Aran harà arribar as domicilis deth territòri un petit escrit en tot presentar-la, acompanhat d’un calendari que compdarà damb dotze mots relacionadi damb es mesi der an corresponents e un adesiu dera marca “En aranés, òc”.

Entara sindica d’Aran, Maria Vergés “era creacion d’aguesta marca e dera campanha que l’acompanhe a coma objectiu demostrar qu’er aranés ei ua lengua viua qu’a de besonh de toti entà hèr-la a créisher, que non ei ua lengua deth passat se non qu’a futur” e higie “a despièch dera manca de recorsi, eth govèrn d’Aran a ua apòsta clara pera normalizacion e impuls dera lengua pròpria d’Aran, qu’ei ua lengua de coesion sociau e era rason d’èster dera institucion e, per tant, de qu’eth  nòste territòri compde damb servicis publics propèrs”.

Vielha, 13 de noveme de 2025