Eth Conselh Generau d’Aran liure es sòns prèmis literaris, de cuertmetratge e de Tic Tòc en aranés

Aguesta tarde s’a hèt era ceremònia de liurament des Prèmis dera XXVau edicion der Aran de Literatura, dera XXXVau des Prèmis Mn. Condò Sambeat, deth IVau Concors de Cuertmetratges e, coma nauetat, deth prumèr de Tik Tòc en aranés.

Aguesti concorsi, organizadi peth Conselh Generau d’Aran, an coma objectiu mantier viua era nòsta lengua, er aranés, e era identitat a trauès dera literatura e es contenguts audiovisuaus.

Aguesta tarde a auut lòc, ena glèisa de Mijaran, era ceremònia de liurament des prèmis Aran de Literatura, Mn. Condò Sambeat, deth IVau Concors de Cuertmetratges e deth Prumèr concors de Tik Tòc en aranés, qu’organize eth Conselh Generau d’Aran a trauès deth sòn Airau de Lengua.

Era sindica d’Aran, Maria Vergés, a manifestat ena sua intervencion que “era situacion actuau der aranés non ei bric bona, mès tanben ei cèrt que damb serades coma aguesta, o dempús de veir eth nivèu de participacion d’iniciatives com era d’Aranvision, eth concors de cançons en aranés, semble qu’encara i a un motiu tara esperança, tostemp qu’era ciutadania comprene era importància de non deishar morir era lengua”. Atau madeish, era sindica d’Aran a felicitat as guanhadors e guanhadores d’aguesti concorsi, e ara rèsta de participants, que damb es sues òbres demòstren eth sòn compromís damb era nòsta lengua, e que mos dèishen un auviatge culturau plan important e de besonh”, e a arregraït tanben “as membres des jurats d’aguesti prèmis e ar airau de Lengua deth Conselh Generau d’Aran era sua dedicacion”.

Es guanhadors d’enguan an estat:

4au Concors de Cuertmetratges

Categoria Infantila

Finalista, eth cuertmetratge “Víuer ena montanha” dera Escòla Garona de Vielha.

Prumèr prèmi tath cuert “E s’escotam era montanha?” dera Escòla Sant Ròc de Bossòst.

Categoria Primària Iniciau

Finalista, “Víuer ena montanha, fòrça entà descurbir” dera Escòla Sant Martin de Gessa.

Prumèr prèmi tath cuert “Eth Mistèri dera nhèu” dera Escòla Garona de Vielha.

Categoria Primària Superior

Finalista, “Es pelhes d’Aran” dera Escòla Sant Ròc de Bossòst.

Prumèr prèmi tath cuert “Eth mèn pòble de montanha” dera Escòla Estudi Alejandro Casona de Les.

Categoria ESO/Bachelierat e cicles

(A estat declarat desèrt)

Categoria associacions, entitats e particulars

Prumèr prèmi tath cuert “Víuer ena natura” dera Associacion ADDA.

Concors de Tic Tòc

Categoria A (entre 14 e 19 ans)

Es guanhadors e guanhadores des prèmis d’aguesta categoria hèn era assignatura d’aranés damb era professora Lourdes España en Institut d’Aran, a on aguesta a estat ua activitat de classa.

Categoria B (a compdar de 19 ans)

Accèssit tàs alumnes dera Escòla d’Ostalaria de Les: Ares Montilla e Lilian Ferreira damb un professor tanben responsable d’aguesta activitats de classa, Eloy López, deth Cors Superior de FP de gestion d’alotjaments toristics.