• Era sindica d’Aran, Maria Vergés, s’a adreçat per carta ath ministre de Transpòrts, Mobilitat e Agenda Urbana der Estat, Óscar Puente, entà demanar damb caractèr urgent era milhora dera seguretat n’aguesta via atau coma que s’agilizen es trabalhs de melhora e adequacion previsti.

Era N-230 que connècte era Val d’Aran e era Ribagòrça damb era rèsta d’Espanha e França se trape entre ua des carrèteres damb un indèx de perilhositat de tot er Estat en tot portar decades d’un deficient mantenement e conservacion. Aguesta problematica se ve nautaments condicionada per elevat numèro de veicles de transpòrt de mercaderies e transpòrt pesat que i passe diariaments, mès de 500, atau coma pes questions meteorologiques, sustot en iuèrn, que hèn qu’aguesta carretèra non sigue adaptada ad aguestes circonstàncies.

Era sindica d’Aran, Maria Vergés, a hèt a saber ath ministre de Transpòrts: “Era grana preocupacion deth govèrn d’Aran dauant d’aguesta situacion, ja qu’era carretèra trauèsse quauqui pòbles deth nòste territòri, en tot méter en risc ara ciutadania d’Aran, atau e coma auem vist enes diuèrsi accidents de camions enes nuclis urbans dera Val d’Aran”, en tot híger que “son milèrs es persones qu’empleguen era N230 en tot eth sòn trajècte e que patíssen era manca de seguretat existenta”.

Eth govèrn d’Aran, que reconeish eth compromís deth Ministèri entà impulsar era melhora dera N-230 en tot licitar es diuèrsi projèctes dera madeisha, a sollicitat accelerar-ne es trabalhs damb era major brevetat possibla.

Ath delà des òbres de melhora, era sindica d’Aran demane ath Ministèri implementar mesures immediates tà garantir era seguretat des persones n’aguesta carretèra, aumentar es contròls de besonh e era aplicacion de mesures preventives contra es condicions meteorologiques advèrses.

Vielha,3 de junh 2025