• Ena comission bilaterau Generalitat-Conselh Generau, celebrada aguest maitin en Palai dera Generalitat, s’a acordat eth traspàs de naues competéncies en matèria de Drets Sociaus ath Conselh, qu’a compdar der an que ven assumirà era gestion e era resolucion des valoracions de discapacitat e dependéncia e que permeterà agilizar es formalitats ara ciutadania aranesa.

• Era Comission Bilaterau a aprovat tanben eth traspàs dera dotacion economica referenta ara Taxa Toristica que requècte era Generalitat en Aran.

Eth conselhèr dera Presidéncia, Albert Dalmau, e era sindica d’Aran, Maria Vergés, an presidit era prumèra comission bilaterau Generalitat – Conselh Generau d’Aran en Palai dera Generalitat. Ua trobada qu’a servit entà arténher acòrds en matèria de drets sociaus, abitatge, espòrts, cultura e entà auançar en nau modèl de finançament entà Aran.

Era Comission Bilaterau a acordat eth traspàs de naues competéncies en matèria de Drets Sociaus ath Conselh Generau d’Aran, qu’a compdar der an que ven assumirà era gestion e era resolucion des avaloracions de discapacitat e dependéncia.

Enquiath moment, era administracion aranesa trabalhaue coma entitat subcontractada pera Generalitat, sense cap de finançament especific, e eth Govèrn aranés assumie es còsti de personau e de foncionament. Maugrat era rapidesa ena realizacion des avaloracions, es resolucions se dictauen des de Lleida, e aquerò alongaue eth temps de demora.

Eth traspàs includís ua dotacion annau de 65.507,92 €, destinada ad aquerò previst, e que s’includirà en acòrd de finançament entre era Generalitat de Catalonha e eth Conselh Generau d’Aran. Damb aguesta transferéncia, era ciutadania aranesa guanharà rapidesa e proximitat, pr’amor qu’es formalitats se haràn integraument en Aran e es persones non se veiràn obligades a desplaçar-se entà Lleida. Tanben supause ua milhora ena qualitat deth servici, perque era atencion s’adaptarà ara realitat sociau e territoriau pròpria.

Es dues administracions an acordat trabalhar ena constitucion deth Consòrci Aranés der Abitatge, que serà operador unic ena Val d’Aran e substituirà er actuau modèl de convènis dera Oficina Locau d’Abitatge, qu’ara madeish non s’adapte ara singularitat deth territòri. Se lo dotarà des mieis economics e tecnics entà arténher es linhes d’accion previstes. Ath delà, es dues parts s’an compromés a trabalhar amassa entà ampliar eth parc de loguèr assequible e entà inscríuer naui solars ena resèrva deth Plan 50.000, qu’actuaument ja compde damb 666 solars en tota Catalonha.

Ara demora de barrar es darrèrs detalhs deth nau modèl, s’a acordat prorrogar er acòrd de finançament signat eth 22 de març deth 2019, que serà provisionau enquia qu’entre en vigor eth nau modèl, a principis deth 2026.

Era Comission Bilaterau a aprovat tanben era transferéncia addicionau deth 30% des ingrèssi deth Hons entath Foment deth Torisme provenents des establiments dera Val d’Aran. Damb aguest nau percentatge, mès eth 20% qu’eth Conselh ja percep, Aran disposarà deth 50% des recorsi deth Hons, mentre qu’er aute 50% anarà entàs ajuntaments aranesi.

En matèria culturau s’a aprovat era creacion dera Comission Mixta entara actualizacion deth traspàs en aguesta matèria, atau coma er impuls d’un Centre Culturau, includit eth cambi de sedença der Archiu Istoric, actuaument plaçat en Arròs e que ja non dispòse de mès espaci; en estudi deth traspàs de competéncies en matèria d’arqueologia, e en refortiment dera cooperacion institucionau.

Era sindica d’Aran, Maria Vergés, a avalorat fòrça positivaments es resultats des negociacions damb era Generalitat de Catalunya damb es acòrds artenhudi en aguesta Comission Bilaterau e a reafirmat “eth compromís deth Govèrn d’Aran entà seguir trabalhant damb leiautat e respècte institucionau entà arténher eth màger desplegament competenciau que permete consolidar er autogovèrn aranés e, per tant, era atencion ara ciutadania d’Aran”.

Vielha, 11 de deseme de 2025