- Es formacions, que se haràn en octobre e noveme, viren ath torn des finances entà non financèrs e era utilizacion deth ChatGPT entà petites empreses.
Eth Conselh Generau d’Aran e Globalleida an signat un convèni de collaboracion qu’a coma objectiu, entre d’auti, proporcionar airines utiles entara melhora des competéncies professionaus e personaus en matèria des finances enes negòcis.
Ei per açò que vos volem aufrir diuèrses e naues formacions gratuïtes adreçades a tota era populacion dera Val d’Aran. Aguestes sessions se haràn enes mesi d’octobre e noveme. Començam damb dues formacions que les serviràn as participants entà melhorar eth sòn coneishement en airaus claus, com es finances e era utilizacion de tecnologies aplicades ath sector empresariau.
Aguestes son es dues prepauses:
- Aprenent deth nòste negòci: finances entà non financèrs, a cargue de Ramon Badia.
Aguesta formacion ei adreçada a ajudar as participants a compréner es dades financères deth sòn negoci. S’analisaràn es magnituds economiques fondamentaus entà poder compréner era evolucion deth negòci: marge brut, despenes de foncionament, resultat, equilibri financèr, tresoreria… Conéisher era nòsta empresa entà diagnosticar e saber com identificar aqueri indicadors e airaus de melhora qu’ajuden a créisher en rendibilitat e minimizar es risqui. Era durada d’aguesta prumèra formacion serà de 3 ores.
- Descorbís com ChatGPT pòt impulsar eth tòn negoci: solucions practiques entà petites empreses, damb Laura Segú.
Un cors practic adreçat a empresaris e autonòms que vòlen aprofitar eth potenciau deth ChatGPT. S’ensenharàn estratègies entà automatizar obratges, melhorar era atencion ath client, generar contengut atractiu e optimizar procediments intèrns, adreçat a petites empreses e qu’aurà ua durada de 4 ores.
Es detalhs sus es formacions e eth procès d’inscripcion seràn publicats enes canaus oficiaus deth Conselh Generau d’Aran e de HèPic, era Hub d’Innovacion en: infohepic@aran.org.
Vielha, 12 d’octobre de 2025