Eth Conselh Generau d’Aran, a trauès de Torisme Val d’Aran, a metut en marcha eth dispositiu de regulacion der accès e era mobilitat enes principaus zònes naturaus deth territòri. Aguesta mesura a coma objectiu preservar er entorn
naturau, milhorar era seguretat e evitar era concentracion excessiva de visitaires en espacis sensibles.
Ath long deth periòde d’ostiu se regularà er accès tàs ribères e pistes de montanha a trauès de contròls establidi enes oraris següents:
- Ribèra de Varradòs e Artiga de Lin: der 11 de junhsèga ath 31 d’agost, de 10:00 a
17:00 ores. - Ribèra d’Aiguamòg e Valarties: der 11 de junhsèga ath 7 de seteme, de 7:30 a
15:30 ores. - Bassa d’Oles: deth 28 de junhsèga ath 31 d’agost, de 10:00 a 17:00 ores.
- Bassa d’Arres: deth 28 de junhsèga ath 31 d’agost, de 10:00 a 17:00 ores.
Coma part d’aguest dispositiu, eth Conselh Generau a contractat onze persones qu’aufriràn eth servici enes diferenti punts d’informacion, situadi enes zones regulades, entà aufrir ua milhor atencion as visitaires.
Ath madeish temps, s’an installat sies pantalhes informatives enes principaus accèssi tath mèdi naturau, e tanben sensors de pas entath contròl e compdatge de veïculs. Enes pantalhes se visualizarà en temps reau er estat de disponibilitat
des diuèrsi parcatges reguladi. Aguesta informacion serà tanben disponibla ena aplicacion Guidaran e en portau web www.aparcaran.conselharan.org.
Eth conselhèr de Torisme, Josep Canut, a soslinhat que: “Damb aguest projècte de regulacion des accèssi reafirmam eth nòste compromís damb un modèl de torisme sostenible e respectuós damb er entorn. Era Val d’Aran ei un territòri de
grana valor naturau e culturau, e ei responsabilitat nòsta garantir-ne era preservacion entàs generacions futures. E higie: “Aguesta iniciativa non sonque milhore era seguretat e era experiéncia des que mos visiten, senon qu’ei tanben ua airina entà ua milhor gestion des fluxes toristics”.
Entath conselhèr de Territòri, Paisatge e Cambi Climatic, Francisco Bruna: “Aguesta accion ei part d’ua estratègia integrau que cerque ua gestion sostenibla der entorn, facilitant ua planificacion mès eficienta deth transit enes pistes
d’accès tàs espacis naturaus.”
Vielha, 10 de junhsèga 2025