• Aguestes bases an de regir er autrejament des Prèmis as Trebalhs de Recèrca en aranés corresponents ara 5au edicion (cors 2025-2026)

Eth Conselh Generau d’Aran a hèt a conéisher es bases reguladores qu’an de regir er autrejament des Prèmis deth Conselh Generau d’Aran entàs Trebalhs de Recèrca en aranés, corresponents ara 5au edicion (cors 2025-2026).

Aguesti prèmis an coma objectiu reconéisher er interès e era dedicacion des estudiants de 2au de Bachelierat der Institut d’Ensenhament Segondari d’Aran que presenten eth sòn Trebalh de Recèrca en lengua aranesa. D’aguesta manèra eth Conselh vò incentivar er usatge der aranés en contèxtes academics e dignificar era lengua pròpria dera Val d’Aran, qu’ei cooficiau en tot eth territòri de Catalonha.

Segons es bases aprovades, poiràn optar ath prèmi es estudiants qu’agen elaborat e exposat eth sòn trebalh de recèrca en aranés e qu’agen obtengut ua qualificacion minimau de notable (8) en centre educatiu.

Es prèmis establissen es següentes quantitats:

• 300 € e diplòma tàs trebalhs damb qualificacion entre 9 e 10.
• 200 € e diplòma tàs trebalhs damb qualificacion de 8.
• Mencion especiau e diplòma tàs trebalhs qu’estúdien aspèctes lingüistics, scientifics, environamentaus o sociaus restacadi damb eth territòri dera Val d’Aran.

Eth jurat, format per dus/dues tecnics/tecniques deth Departament de Cultura e Lengua deth Conselh Generau d’Aran, avalorarà principaument era correccion normativa dera lengua e era qualitat dera expression orau des candidats, damb ua puntuacion maximau de 10 punts e un minim de 8 entà accedir ath prèmi.

Es sollicituds e trebalhs se poiràn presentar en registre generau deth Conselh Generau d’Aran abans deth 28 de hereuèr de 2026.

Es prèmis se liuraràn en acte oficiau de graduacion organizat per Institut d’Aran. Era concession deth prèmi implique tanben autorizar ath Conselh Generau d’Aran a publicar eth trebalh premiat ena sua web oficiau pendent un an.

Es bases son publicades en taulèr d’anoncis deth Conselh Generau d’Aran e ena sua web institucionau.

Vielha, 13  de noveme 2025