• En 2020, mès de 200 persones participèren “activaments” en Aran Accion 2030 tà dar era sua opinion sus quina ère era Val d’Aran que volien entà 2030.

• De totes es prepauses hètes pera ciutadania, un 88% ja s’an desvolopat e ara se daurís era dusau fasa d’aguest plan de participacion ciutadana entà definir es rèptes e oportunitats deth territòri enquia 2030.

• Atau madeish, ara tanben se publiquen totes aguestes conclusions e eth resultat des trabalhs dera prumèra fasa d’Aran Accion 2030.

En 2019, eth Conselh Generau d’Aran impulsèc un Plan Estrategic entà definir es linhes prioritàries entara generacion d’oportunitats  e era dinamizacion economica deth territòri. En aguest diagnostic se hec evident qu’Aran, pr’amor dera iperespecializacion en sector toristic, auie un modèl economic damb fòrça estacionalitat laborau que provòque inestabilitat e precarietat ena aucupacion, fluctuacions demografiques e manca d’atractiu tà aucupacions de naut valor. Situacion agreujada per qüestions coma era manca d’accès ar abitatge e er  increment deth còst dera vida e desequilibris sociaus.

Ena primauera de 2020, pendent era pandèmia dera COVID-19, eth Govèrn d’Aran desvolopèc un procès de participacion ciutadana nomentat Aran Accion 20-30, damb un qüestionari dubèrt en qué mès de 200 persones participantes, provenentes de diuèrsi sectors dera societat aranesa, s’amassèren telematicament en 7 grops de trabalh: agroalimentacion, atencion as persones, espòrt, economia verda, formacion e retencion de talent, innovacion e tecnologia.

Ath long d’aguestes trobades periodiques en linha, en cada un d’aguesti grops, se bastiren de manèra conjunta un amàs de prepauses entà transformar eth modèl territoriau de futur en tot demanar se quina ei era Val d’Aran que volien auer en 2030. Totes aguestes aportacions dera gent d’Aran les podetz consultar en aguest ligam: Aran Accion 2020-2030 | Conselh Generau d’Aran

En toti es grops d’aguestes videoconferéncies, era gent tanben manifestèc era importància d’aufrir airines entà qu’es diferenti sectors podessen trapar solucions mès eficientes e era innovacion s’establic coma èish transversau de totes es prepauses ciutadanes.

Atau donc, eth Govèrn d’Aran creèc HèPic, eth centre d’innovacion territoriau deth Conselh Generau, que hè d’intermediari entre es entitats publiques e privades entà diversificar era economia aranesa en tot possar projèctes pilòts e ajudar as empreses araneses a innovar e ampliar es sòns servicis e productes.

Totes aguestes directives ciutadanes an mercat eth punt de partida deth govèrn aranés, que pendent aguesti 5 ans a implementat e ei en fasa d’execucion deth 88% de totes es aportacions compartides en aguest procès participatiu. Ara, a miei camin deth 2030, hè un retorn a totes es persones participantes compartint er informe des projèctes e arregraïnt-les era implicacion e eth temps dedicat.

Vielha,  10 d’ abriu de 2026