- Era accion, impulsada per Foment Torisme Val d’Aran, a compdat damb ua subvencion de 44.000 euros dera Deputacion de Lhèida e a refortit era estratègia digitau e eth lòc web visitvaldaran.com
Eth Govèrn d’Aran, a trauès de Foment Torisme Val d’Aran, a intensificat pendent er an 2025 era dinamizacion e gestion des hilats sociaus entà milhorar era promocion toristica dera destinacion. Aguesta inversion a permetut definir e consolidar un nau Social Media Plan (SMP), en consonància damb es objectius e directives deth Plan de Marqueting Toristic Sostenible 2023-2026, e establir un protocòl de crisi reputacionau entà poder actuar damb agilitat en cas de besonh.
Ath long der an, s’a trabalhat ena conceptualizacion, redaccion, dessenh, planificacion e programacion estrategica des publicacions en Twitter, Facebook, Instagram, YouTube, TikTok, Pinterest e LinkedIn, tà assegurar que toti es contenguts siguessen alinhadi damb es objectius fixadi. Parièrament, s’a refortit era gestion dera comunitat digitau, tà garantir ua responsa as likes, mencions e comentaris en un tèrme maxim de 48 ores, e fomentar era interaccion damb empreses toristiques, institucions e entitats locaus ligades ara promocion dera Val d’Aran.
Era estratègia a includit tanben era recèrca e seleccion de contenguts d’interès toristic, era identificacion de prescriptors e usatgèrs influents, atau com era deteccion d’oportunitats comunicatives. S’an conceptualizat e planificat campanhes promocionaus especifiques, s’a desvolopat eth dessenh grafic des creativitats e s’an gestionat campanhes publicitàries en hilats sociaus damb un pressupòst maximau de 10.000 euros, consensuat damb Foment Torisme Val d’Aran.
Tot açò s’a acompanhat d’un seguiment continuat des tendéncies e bones practiques, damb era elaboracion d’informes bimensuaus d’avaloracion e recomanacions estrategiques.
Parallèlament, s’an hèt diuèrses modificacions e ampliacions en lòc web oficiau visitvaldaran.com entà milhorar-ne era estructura, era foncionalitat e era experiéncia der usatgèr. Entre aguestes accions i é era creacion, modificacion o eliminacion de fiches d’empreses e sòcis, era incorporacion de naues seccions, era creacion de sliders entara pagina iniciau, era maquetacion de contenguts entà campanhes puntuaus e era installacion de naues foncionalitats.
Totes aguestes accions an recebut eth supòrt dera Deputacion de Lhèida, mejançant ua subvencion de 44.000 euros, qu’a contribuït a consolidar era estratègia digitau dera Val d’Aran e a refortir-ne eth posicionament coma destinacion toristica de referéncia.
Vielha, 14 de hereuèr 2026