• Era sindica d’Aran, Maria Vergés, a hèt a arribar ath president dera Confederacion Idrografica der Èbre (CHE), Carlos Arrazola, era sua preocupacion per estat actuau der arriu Garona en determinadi endrets deth territòri, especiauments peth risc que represente tara populacion en quaqui trams urbans e periurbans coma en Vielha, Bossòst e Les.

• Autant er ajuntament de Vielha e Mijaran coma eth de Les, qu’an an hèt a arribar en diuèrses ocasions era sua preocupacion ara pròpria CHE, comunicauen tanben aguesta situacion ath Conselh Generau d’Aran.

En ua carta adreçada ath president dera CHE, era sindica d’Aran a remercat que: “ath long des darrèris ans, era Garona s’a anat colonizant de vegetacion que, mès enlà des marges der arriu, a envadit eth lheit en diuèrsi trams, especiaument en zònes urbanes e periurbanes, damb eth risc qu’açò compòrte deuant de fenomèns climatologics advèrsi que, per un aute costat, cada viatge son mès soentejadi”.

En cas de Vielha, atau e coma a metut de manifèst eth sòn Ajuntament, es zònes problematiques se tròben ath costat der Institut e dera Escòla d’Infantila e Primària. Per çò que hè, entre d’auti, ath municipi de Les, eth risc de collapse se d’infraestructures viàries ei naut e se trape en zona periurbana. Atau madeish, en cas de Bossòst ei de besonh poder actuar ena entrada dera Garona en tram urban, en tot netejar e rehèr proteccions.

En aguest sens, era sindica d’Aran manifestaue que “auem sollicitat ara CHE que, damb caractèr urgent, se desvolope un plan de neteja e condicionament des trams critics dera Garona, especiauments aqueri plaçadi en zònes poblades, entà garantir era seguretat des vesins dera Val d’Aran.”

Vielha, 29 de seteme de 2025