• Era Val d’Aran a barrat ua naua edicion deth Programa de Tecnificacion Infantila d’Espòrts d’Iuèrn, ua iniciatiua ja plenament consolidada que, an darrèr an, a tornat a demostrar eth sòn gran valor entath desvolopament esportiu e personau des joeni deportistes deth territòri.

Ath long dera sason, es mainatges/ades e joeni/es an participat en un programa estructurat d’entrenaments sus nhèu e preparacion fisica, pensat entà milhorar es sues capacitats tecniques, fisiques e tactiques, mès tanben entà educar en valors fondamentaus coma eth companherisme, eth respècte, era responsabilitat e era cultura der esfòrç. Tot açò, en un entorn segur, professionau e adaptat as besonhs de cada edat e disciplina.

Eth programa, impulsat peth Conselh Generau d’Aran, s’a desvolopat en estreta collaboracion damb es clubs esportius dera Val, atau coma damb institucions e autes entitats deth territòri. Aguesta cooperacion ei estada clau entà garantir era qualitat deth projècte e entà arténher ua vertadèra coordinacion entre totes es parts implicades, en tot reforçar eth modèl esportiu aranés basat en trabalh conjunt e en vision de futur.

Ath delà des aspèctes estrictament esportius, eth Programa de Tecnificacion Infantila s’a convertit en un espaci de creishement personau, a on es joeni deportistes an pogut desvolopar habilitats sociaus, apréner a trabalhar en equipa e a conviuer damb d’auti companhs, consolidant atau ua basa fòrça importanta entath sòn futur, tant laguens coma dehòra der espòrt.

Eth Conselhèr d’Espòrts a volut méter en valor era importància d’aguest projècte:

“Eth Programa de Tecnificacion Infantila ei fòrça mès qu’un conjunt d’entrenaments. Ei ua apòsta estrategica deth país entà formar es nòsti joeni, en tot combinar exceléncia esportiva e educacion en valors. Volem méter en valor eth trabalh que se hè des des clubs e des tecnics, entitats e institucions deth territòri, e era implicacion des familhes, que son ua pèça clau entà que tot açò sigue possible. Ei fòrça gratificant veir era evolucion des deportistes e eth nivèu de compromís que an demostrat pendent tota era sason.”

Dempús d’ua sason intensa e fòrça profitosa, des deth Conselh Generau d’Aran se vò encoratjar a toti es participaires a mantier era sua activitat esportiva pendent es mesi d’ostiu, en tot contunhar entrenant damb es sòns clubs. Era continuitat ei fondamentau entà consolidar es aprenentatges e encarar era pròplèu sason d’iuèrn damb era milhor preparacion possibla.

Atau madeish, se vò arregraïr fòrça sincerament era implicacion de toti es agents que hèn possible aguest programa: clubs, tecnics, familhes e entitats collaboradores. Sense aguest trabalh conjunt, non serie possible mantier un projècte d’aguesta qualitat e impacte en territòri.

Aguest barrament de sason non ei sonque un punt e seguit, senon ua oportunitat entà seguir creishent e melhorant. Eth Programa de Tecnificacion Infantila d’Espòrts d’Iuèrn reafirme, un an mès, eth compromís dera Val d’Aran damb era promocion der espòrt de basa, era formacion integrau des joeni e eth desvolopament d’un modèl esportiu pròpri, sòlid e de futur.

Vielha, 1 d’abriu de 2026