- Ena amassada mantenguda aué entre eth conselhèr d’Agricultura, Ramaderia e Pesca dera Generalitat e era sindica d’Aran, tanben s’a acordat era actualizacion des traspassi en matèria de licéncies de caça e pesca.
Eth conselhèr d’Agricultura, Ramaderia, Pesca e Alimentacion dera Generalitat de Catalunya, Òscar Ordeig, s’a amassat aué damb era sindica d’Aran, Maria Vergés, es vicesindics deth Conselh Generau, Francés Bruna e Oriol Sala, e eth conselhèr d’Infraestructures e Òbres, José Luis Boya ena sua visita entà Aran.
Pendent era amassada, es dues institucions an acordat eth traspàs dera competéncia en matèria de gestion forestau, en compliment deth regim especiau d’Aran e damb er objectiu de refortir er autogovèrn aranés e melhorar era gestion des recorsi naturaus deth territòri.
Eth govèrn d’Aran presentèc ua propòsta ath departament d’Agricultura entà arténher aguest acòrd de traspàs, qu’a coma objectiu consolidar eth desvolopament dera gestion forestau en Aran e era sua contunhacion per çò que hè ara transicion energetica.
Un aute des acòrds artenhudi ei eth dera regularizacion deth deute pendent corresponent as licéncies de caça e pesca, atau com er establiment d’un sistèma de transferéncies annaus fixes a favor deth Conselh Generau d’Aran pes impòrts des licéncies de caça e pesca emetudes a residents ena Val d’Aran.
Era sindica d’Aran, Maria Vergés, a avalorat fòrça positivament er acòrd de traspàs: “era transicion energetica e era gestion territoriau atau coma era diversificacion dera economia son clau entà Aran. Aguest traspàs mos permeterà contunhar damb aguesta linha estrategica ”.
En aguest contèxte, eth conselhèr Ordeig a soslinhat que “trabalhar entà garantir ua bona gestion forestau ei ua prioritat de país e ua prioritat d’aguest Govèrn”, vista era foncion clau des bòsqui ena prevencion d’incendis, ena luta contra eth cambi climatic e en desvolopament economic deth territòri.
Vielha, 08 de gèr de 2026