• Eth projècte Guarda+ a estat includit en Banc de Bones practiques des govèrns locaus de Catalunya (BBP) dera Federació de Municipis de Catalunya e dera Fundació Carles Pi i Sunyer d’Estudis Autonòmics i Locals.

• Aguest projècte pilòt permet que quinsevolh persona pogue gaudir de manèra interactiva e immersiva dera natura e era cultura dera Val d’Aran en guardadèr de Beret e tanben a distancia.

• Desvolopat pera empresa aranesa Arantec, s’includís laguens der Airau Digitau d’Aran liderat per HèPIC, deth Conselh Generau, e ei part deth projècte Àrees Digitals dera Generalitat de Catalunya.

Eth projècte Guarda+ a estat guerdonat en Banc de Bones practiques des govèrns locaus de Catalunya (BBP) dera Federacion de Municipis de Catalunya e dera Fundació Carles Pi i Sunyer d’Estudis Autonòmics coma practica significativa. Des dera Federació de Municipis de Catalunya s’an premiat es experiéncies que representen ua aportacion nauedosa e que pòden servir de referéncia innovadora entà d’auti ajuntaments o entitats locaus.

Aguest projècte desvolopat per Arantec, ei ua solucion pionèra damb tecnologia 5G, que vò redusir era brèca digitau en zònes ruraus e enriquir era experiéncia toristica e culturau ena Val d’Aran. Guarda+ aufrís informacion meteorologica en temps reau, visites virtuaus ath nòste patrimòni culturau e recreacions istoriques, e d’autes dades d’interès per miei d’ua aplicacion mobila e ua plana web que permet tanben, víuer ua experiéncia immersiva damb lunetes de realitat virtuau e augmentada.

Eth conselhèr d’Innovacion, Oriol Sala, a remercat que: “Guarda+ represente un succès de collaboracion damb ua empresa aranesa innovadora que damb aguest pilòt a artenhut a desvolopar e adquirir mès coneishements enes naues tecnologies, e atau, poder aufrir mès servicis deth territòri ençà, e damb aguesta distincion volem remercar era importància d’apostar peth talent aranés”.

 Eth projècte pilòt Guarda+ s’includís laguens der Airau Digitau d’Aran, liderat deth centre d’innovacion territoriau deth Conselh Generau d’Aran, HèPic, e impulsat per  Institut per al Desenvolupament i la Promoció de l’Alt Pirineu i Aran (IDAPA), era Diputació de Lleida, era Cambra de Comerç de Lleida, qu’an finançat aguest projècte.

Aquesta iniciativa ei part der hilat Àrees Digitals qu’a coma objectiu milhorar es competéncies en naues tecnologies des empreses de tot eth territòri català, especiaument enes territòris ruraus, impulsat pera Generalitat de Catalunya, Mobile World Capital Barcelona e era Fundació i2CAT.

Vielha, 03 d’octobre de 2025