• Es darrèrs indicadors, entre es mesi de gèr e seteme, mèrquen aguest increment, que supère es donades de remassada de tot er an 2024.

• Aguestes chifres constaten era efectivitat deth nau modèl de remassada de residus e era implicacion dera societat aranesa, en aguest cas des grani productors, damb era sostenibilitat ambientau deth territòri.

Era analizi des donades dera remassada de residus organics ena Val d’Aran dempús dera implantacion deth pòrta a pòrta tà grani productors demòstre que, entre es mesi de gèr e seteme de 2025 s’an recuperat 398 t (tones) de fraccion organica, que contrasten damb es 246 t de tot eth 2024.

Eth passat mes d’abriu se metec en marcha eth nau modèl de remassada selectiva en otèls, restaurants, granes superficies e comèrci, de manèra progressiva, e cinc mesi dempús s’a podut constatar qu’era remassada d’organica en aguest periòde a estat de 321 tones. Ad aguesta quantitat i cau híger çò que respècte a d’autes fraccions, a on es chifres tanben s’an incrementat damb aguesta remassada selectiva.

Entre es mesi de gèr a seteme, era remassada selectiva de papèr e carton a aumentat un 14%, eth plastic un 20%, e en veire i a auut ua pujada deth 2%.

Damb er increment de remassada selectiva s’amendrís era fraccion dera rèsta (residu sense separar) en un 9%, çò que constate era efectivitat deth sistèma en tot apropar es donades as qu’era UE exigís coma d’obligat compliment, qu’entà 2030 aurien d’arribar ath 30%   en tot esvitar atau grani increments de còsti.

Eth vicesindic dusau e conselhèr de Gestion Ambientau, Oriol Sala, a soslinhat que “constatam era implicacion deth sector de grani productors ena implementacion deth nau modèl de remassa de residus, qu’a supausat auer ues prumères donades molt favorables”. “Èm conscients der esfòrç que supòse aguesta normativa, e eth Govèrn d’Aran trebalhe entà garantir eth nòste servici dia a dia, entà qu’eth pòrta a pòrta sigue un benefici non sonque economic entàs nòsti vesins senon tanben ambientau”, higie eth conselhèr Sala en tot destacar que “aguesti residus que se remassen en pòrta a pòrta non arriben enes ièrles [de contenedors], çò que supause ua disminucion des apileraments en aguesti espacis, sustot quan i a ua grana afloéncia de visitaires en territòri”.

Eth conselhèr Sala a volut tanben arregraïr eth trabalh e implicacion autant deth personau tecnic deth Conselh Generau d’Aran, coma dera pròpria empresa adjudicatària, entà desvolopar tota aguesta implementacion.

Vielha 21 d’octobre de 2025