• Es dies 18 e 19 de junhsèga er IRTA e eth Conselh Generau d’Aran organizen es Jornades OVIHUEC.DAT de metuda en valor dera ramaderia extensiva

• Es Jornades compdaran damb ua part tecnica, damb participacion de diuèrsi expèrts ena matèria, e damb ua part ludica en tot presentar era prumèra Hèsta OVIHUEC.DAT en Vilamòs damb fòrça activitats tà toti es publics.

Es pròplèu dies 18 e 19 de junhsèga s’organizen en Aran es prumères jornades ar entorn deth projècte OVIHUEC.DAT que pretenen méter en valor eth sector ramadèr, n’aguest cas ovin. N’aguest sens, s’a organizat ua jornada tecnica qu’acuelherà a membres des quate centres de recerca que formen part deth projècte: er Institut de Recerca i Tecnologia Agroalimentaria (IRTA), eth Centre de Ciència i Tecnologia Forestal de Catalunya (CTFC), eth Centre de Recerca en Economia i Desenvolupament Agroalimentari (CREDA) e era Fundación Centro Tecnológico de la Información y la Comunicación (CTIC). Autant coma a expèrts enes encastres dera ramaderia, era biologia e era produccion agroalimentària.

Eth diuendres 18 de junhsèga a compdar des 17 ores en Era Audiovisuau de Vielha s’amiaràn a tèrme diuèrses conferéncies e taules rodones, atau coma era presentacion deth libre “Era naua economia entàs pòbles ruraus deth sègle XXI” de Jaime Izquierdo en format de taula redona. E en acabar, se projectarà un documentau “Un pòble sense ramat, ei un pòble mòrt” en format cinefòrum, que tracte sus es traspassi familhaus d’aguest tipe de negòcis.

Londeman, eth dissabte 19 de junhsèga, era Hèsta OVIHUEC començarà damb ua exibicion de can pastor en prat dera honada de Vilamòs entàs 9.30 ores. E contunharà damb un show cooking dera chef Ada Parellada que darà a conéisher diuèrses formes de codinar er anhèth.

Pendent eth dia i aurà talhèrs, jòcs e activitats entara mainadèra, visita deth ramat comunitari d’Ovihuec e explicacion deth foncionament des colièrs GPS, un dinar popular damb carn d’anhèth, e diuèrses activitats culturaus.

Totes es activitats simultànies se realizaràn en diuèrsi endrets de Vilamòs en grops de 25 persones entà assegurar eth sòn corrècte desvolopament e i aurà inscripcion prèvia a trauès deth ligam: https://forms.gle/iPNe7rB2Q12op4MG9.

Atau e coma explique  conselhèr de Gestion Ambientau e Transicion Energetica e d’innovacion, Oriol Sala: “Aguestes jornades pretenen, non sonque visibilizar era importància deth projècte Ovihuec, se non tanben èster un punt de contacte e intercambi de coneishements e experiéncies entre professionaus deth sector e expèrts scientifics”.

Aguestes jornades ar entorn deth projècte OVIHUEC.DAT vòlen dar a conéisher tot eth desvolopament scientific darrèr deth ramat e eth propòsit d’arténher era diversificacion dera nòsta economia mejançant era potenciacion dera pagesia e er aprofitament des sòns productes derivadi. Segontes era sindica d’Aran, Maria Vergés: “Informar de manèra interactiva e inclusiva as aranesi e araneses des projèctes que se desvolopen en territòri a on conviuen realitats diferentes: era agricòla, era ramadèra, era economica, era sociau e era toristica.”

Ovihuec ei un projècte impulsat peth Conselh Generau d’Aran, er Ajuntament de Vilamòs, er e Institut de Recerca i Tecnologia Agroalimentària (IRTA) en tot compdar tanben damb eth supòrt d’organismes de recèrca de prestigi reconeishut. I participen tanben: eth Centre de Ciència i Tecnologia Forestal de Catalunya (CTFC), eth Centre de Recerca en Economia i Desenvolopament Agroalimentari (CREDA) e era Fundación Centro Tecnológico de la Información y la Comunicación (CTIC), e a estat possible gràcies ath finançament dera Fundación Biodiversidad a trauès deth Ministèri de Transicion Ecologica y Rèpte Demografic.

Era ramaderia extensiva tostemp a gestionat eth paisatge d’Aran, e ei per açò, que damb aguest projècte se vò visibilizar era importància deth trabalh des pastors e pastores entà sanejar es bòsqui, protegir-mos deth risc d’incendis e preservar era biodiversitat der entorn.

Ovihuec.dat ei fòrça mès qu’un ramat public, a coma objectius: testar es naues tecnologies aplicades ath sector ramadèr que permeten eth contròtle dera localizacion e benèster deth bestiar en remòt tà poder facilitar eth trabalh des pastors e pastores, milhorant era sua qualitat de vida; dar valor ath producte obtengut deth bestiar definint ua cadea de valor agroalimentària, e finaument; remassar donades e analisar es resultats d’aguest ramat public en Vilamòs entà demostrar es beneficis dera ramaderia extensiva a trauès dera sciéncia aplicada.

Vielha, 25 de junh 2025