• Es candidatures d’Escala e Lamuela an estat escuelhudes en aguesta 7au edicion deth Prèmi Robèrt Lafont, de manèra ex aequo, pes sues trajectòries coma referents ena normalizacion, defensa e promocion der aranés

Era Generalitat de Catalunya autrejarà eth deluns, 19 de deseme, eth 7au Prèmi Robèrt Lafont, de manèra ex aequo, a Xavier Lamuela Garcia e Lissa Escala, pes sues trajectòries coma referents ena normalizacion, defensa e promocion der aranés.

D’un costat, eth jurat d’aguest prèmi, format per representants dera Generalitat de Catalunya e deth Conselh Generau d’Aran, destaque dera jornalista Lissa Escala auer estat pionèra dera ràdio en aranés, damb eth prumèr programa en aranés en Ràdio Aran, prètzhèt qu’a desvolopat ath long de mès de 30 ans damb programes coma Meddia Aranés, en Catalonha Informacion, contribusint a un modèl d’emplec e de prestigi sociau der aranés. Tanben destaque eth sòn compromis civic ena promocion dera lengua pròpria d’Aran er impuls d’iniciatives sociaus tant importantes entath territòri coma era Corsa Aran per sa Lengua, que reivindique era defensa e promocion der aranés.

D’un aute costat, eth lingüista e sociolingüista, doctorat en filologia romanica, Xavier Lamuela, a estat professor enes Universitats de Tolosa de Lengadòc, Girona, Autònoma de Barcelona, Lleida e Manchester, e eth jurat destaque que formèc part dera Comission que redactèc es Normes Ortografiques der Aranés en 1982, presidic eth Conselh dera Lengua Occitana (fondat en 1996) e actuauments ei membre deth Conselh Consultatiu der Aranés, creat peth Conselh Generau d’Aran en 2021 tar assessorament en matèria lingüistica dera maxima institucion aranesa. Lamuela ei autor d’un extens e rigorós trabalh academic damb transferéncia sociau, de diuèrsi estudis e libres sus era lengua, atau un coma defensor dera occitanitat der aranés mès tanben deth besonh qu’aguest sigue considerat coma primordiau e preferent ena politica lingüistica dera Generalitat coma lengua tanben oficiau deth territòri catalan, e qu’a d’èster dotada de toti es mieis de besonh tara sua perviuença.

Rebrembam qu’eth Prèmi Robèrt Lafont, autrejat peth departament de Cultura dera Generalitat de Catalunya, a coma objectiu reconéisher e premiar as persones o entitats que s’agen distingit pera defensa, projeccion e promocion dera lengua en totes es sues variants, en quinsevolh punt deth domèni lingüistic.

Era sindica d’Aran, Maria Vergés, afirmaue que “andús premiadi meriten aguest reconeishement per nombrosi motius, pr’amor que son referents en impuls, estudi e defensa dera lengua e cultura pròpries d’Aran, per aguest motiu, deth govèrn deth Conselh Generau d’Aran ençà non podem hèr mès que felicitar-les e dar-les es gràcies pera gran labor qu’an amiat a tèrme pendent toti aguesti ans”.