• Eth Plen deth Conselh Generau d’Aran a aprovat per unanimitat, era modificacion des Nòrmes Subsidiàries entà regular era installacion de captadors solars entà autoconsum ena Val d’Aran e perméter atau er autrejament de licéncies per part des Ajuntaments.

Eth Plen deth Conselh Generau d’Aran a aprovat aué per unanimitat era modificacion iniciau des Nòrmes Subsidiàries de Planejament urbanistic que afecten es municipis de Bossòst, Es Bòrdes, Canejan, Les e Vilamòs, damb er objectiu principau de regular era implantacion de captadors solars entà autoconsum, dubertures enes tets e lucanes. Es municipis de Vielha e Mijaran e Naut Aran dejà an aguesta normativa aprobada.

Aguest cambi normatiu a de servir entà dar responsa a naui besonhs energetics e ambientaus que non èren previsti ena normativa urbanistica vigenta que date de 1982. Ath madeish temps, vò garantir ua armonizacion de criteris a nivèu territoriau, en tot establir un marc comun entà toti es municipis en encastre dera sostenibilitat e era eficacitat energética, çò que permet unificar es critèris d’autrejament de licéncies urbanistiques per part de toti es ajuntaments d’Aran.

Aguesta modificacion includís tanben critèris especifics entàs òbres enes losats, que garantisque tant era compatibilitat damb eth paisatge tradicionau aranés coma era viabilitat tecnica e legau des installacions fotovoltaiques e termiques.

Aguest acòrd represente un pas important ena modernizacion deth planejament urbanistic aranés e facilite era transicion energetica en  tot respectar es valors patrimoniaus e paisatgistics dera Val d’Aran.

Entara sindica d’Aran, Maria Vergés: «Damb aguesta modificacion normativa hèm un pas decidit de cap a un modèl energetic més sostenible, adaptat as besonhs actuaus en tot garantir eth dret dera nòsta ciutadania a accedir as energies renovables”. E a hijut: “Volem facilitar era incorporacion d’aguestes energies, coma er autoconsum solar, sense renonciar ara proteccion deth paisatge aranés ne ath respècte peth nòste patrimòni arquitectonic”.

Vielha, 09 de mai de 2025